امت فاؤنڈیشن کی پہل: مسلم طلبہ کو دے گی مفت کوچنگ

ریاست راجستھان کے اجمیر شہر میں مسلم طلبہ کے لیے تعلیم و تربیت اور ترقی کے حوالے سے امت فاؤنڈیشن نے ایک نئی پہل شروع کی ہے، جس کے تحت نویں جماعت سے بارہویں جماعت کے طلبہ کو مفت کوچنگ دی جائے گی۔

اجمیر شہر کے اندر کوٹ علاقے میں امت فاؤنڈیشن تنظیم کی جانب سے ایک پروگرام کا اہتمام کیا گیا، جس میں مقامی دانشوروں، علماء کرام اور مسلم لیڈران نے حصہ لیا۔

جہاں فاؤنڈیشن کے عہدے داران نے مسلم طلبہ کے سنہرے مستقبل کے حوالے سے غور و فکر کرتے ہوئے امت فاؤنڈیشن کی مفت کوچنگ کی پہل کو اچھا بتایا۔

اس کوچنگ سینٹر میں مسلم پردہ نشین حجاب والی لڑکیوں کے لیے مختلف جگہ مقرر کی ہوئی ہے، جبکہ تمام طلبہ کو کوچنگ سینٹر میں داخلہ کے لیے اپنے آدھار کارڈ اور تعلیمی ادارے کی سند پیش کرنی ہوگی۔

اجمیر ضلع مائناریٹی آفیسر محمد جلال الدین کے مطابق ریاستی اور مرکزی حکومت کی اقلیتی اسکیم سے بھی طلبہ کو فیض پہنچایا جائے گا، جس کے لیے امت فاؤنڈیشن کے ای متر سینٹر کا استعمال کرسکتے ہیں۔

فاؤنڈیشن کے زیر اہتمام کوچنگ سینٹر کے آغاز کے موقع پر درگاہ شریف کے خادم مولانا سید محمد مہدی نے امت فاؤنڈیشن کی سراہنا کی ہے اور ہر قدم پر فاؤنڈیشن کے نیک کارخیر میں ساتھ کھڑے رہنے کے لیے عوام سے اپیل بھی کی ہے۔

اجمیر کے مسلم علاقوں میں امت فاؤنڈیشن کے اس قدم کی خوب تعریف کی جارہی ہے۔ مسلم طلبہ بے حد خوش ہیں کہ انہیں اپنے مستقبل کو نکھارنے کے لئے اب مایوس نہیں ہونا پڑے گا۔