ملک بھر میں کورونا وائرس کی پھیلاؤ کے چین کو توڑنے کے لیے ملک گیر سطح پر لاک ڈاؤن کیا گیا ہے۔ لاک ڈاؤن کی وجہ سے کثیر تعداد سے گلزار رہنے والی اجمیر شریف درگاہ پر بھی اب سناٹا پسرا ہوا ہے۔ خاص بات یہ ہے کہ درگاہ شریف زیارت کرنے پہنچے چار ہزار سے زیادہ زائرین لاک ڈاؤن کی وجہ سے اجمیر میں ہی پھنسے ہوئے ہیں۔
سلطان الہند حضرت خواجہ معین الدین حسن چشتی رحمۃ اللہ علیہ کی بارگاہ میں ہمیشہ عقیدتمندوں کا ہجوم نظر آتا تھا لیکن لاک ڈاؤن کی وجہ سے اب درگاہ عام زائرین کے لیے بند کر دی گئی ہے۔ ایسے میں لاک ڈاؤن سے قبل اجمیر پہنچے چار ہزار زائرین یہی پھنسے رہ گئے جنہیں اب اپنے شہر جانے کی بے چینی ہے۔ حالانکہ درگاہ کمیٹی نے پی یم او میں ان زائرین کے اجمیر میں پھنسے ہونے کی اطلاع دے دی ہے اور مطالبہ بھی کیا ہے کی ان کی واپسی کے انتظامات بھی کیے جائیں۔
اجمیر میں پھنسے زیادہ تر زائرین کا تعلق تلنگانہ سے ہے ان کے ساتھ چھوٹے بچے اور خواتین بھی شامل ہیں۔
ان چار ہزار زائرین کو درگاہ علاقے میں ہی رکھا گیا ہے جہاں مقامی تنظیموں کی جانب سے کھانے پینے اور میڈیکل کا پورا دھیان رکھا جارہا ہے۔ ایسے میں ان کو بس انتظار ہے تو لاک ڈاؤن کے کھلنے کا یا پھر ان کے شہر روانگی کے انتظامات کا۔
اس موقعے پر حیدرآباد سے تعلق رکھنے والے ایک زائرین بتایا کہ' وہ لوگ تقریباً ایک ماہ سے یہاں پھنسے ہوئے ہیں۔ انہوں نے تلنگانہ کی ریاستی حکومت اور اویسی بردران سے حیدرآباد واپسی کے لیے امداد طلب کیا ہے۔
