بھارت اور انگلینڈ کے مابین تیسرے ٹیسٹ میچ کے لیے آف لائن ٹکٹوں کی فروخت آج سے شروع ہوگئی، ابھی تک میچ کے لیے ٹکٹ نجی ویب سائٹ اور بی سی سی آئی کی ویب سائٹ پر آن لائن فروخت کی جارہی تھی۔
احمد آباد کے سب سے بڑے اسٹیڈیم میں کھیلے جانے والے پہلے بین الاقوامی ٹیسٹ میچ پر احمد آباد کے باشندے کافی پرجوش ہیں، لوگوں نے 300 روپے سے لے کر ایک ہزار روپے تک کے ٹکٹ خریدے، شائقین کی سہولت کے لیے 15 ٹکٹ کاؤنٹر بھی بنائے گئے تھے۔
وہیں گاڑیوں کی پارکنگ کے لیے 25،000 گاڑیوں کی گنجائش کا بھی انتظام کیا گیا ہے، لیکن پارکنگ کے لیے کوئی ٹکٹ کاونٹر نہیں بنائے گئے تھے، گیٹ پر سکیورٹی نے شائقین کو بتایا کہ پارکنگ کا ٹکٹ میچ کے دن آمد پر ہی بنایا جائے گا، انتظامیہ نے تیسرے ٹیسٹ کے لیے 50 فیصد شائقین کو اسٹیڈیم میں جانے کی منظوری دی ہے، انگلینڈ کو یہاں دو ٹیسٹ اور پانچ ٹی ٹونٹی میچ کھیلنا ہیں۔
بھارتی سلیکٹرز نے تیسرے ٹیسٹ کے لیے اپنی 17 رکنی ٹیم کا اعلان کیا ہے، فاسٹ بولر شاردل ٹھاکر کو وجے ہزارے ٹرافی کے لیے ریلیز کردیا گیا ہے اور اب ان کی جگہ امیش یادو کو ہندوستانی ٹیم میں شامل کیا جائے گا۔
