ریاست گجرات کا احمدآباد شہر کورونا کا سب سے بڑا مرکز بن گیا ہے. جہاں کورونا مریضوں کی تعداد 1248 تک پہنچ چکی ہے۔
کورونا وائرس کے بڑھتے قہر کی وجہ سے احمد آباد کے کئی علاقوں میں کرفیو نافذ کیا گیا ہے. 21 اپریل کو احمدآباد کے کرفیو کو ختم کرنے کا اعلان کیا گیا تھا لیکن حالات کے پیش نظر کرفیو میں توسیع کی جاسکتی ہے۔
احمد آباد کے رکن اسمبی غیاث الدین شیخ نے وزیراعلیٰ وجے روپانی کو ایک خط لکھ کر مطالبہ کیا ہے کہ 24 اپریل سے ماہ رمضان شروع ہونے والا ہے اس لیے احمدآباد میں کرفیو میں توسیع نہ کی جائے۔
انہوں نے وزیراعلیٰ سے گزارش کی ہے کہ عوام لاک ڈاؤن میں پورا تعاون دے رہی ہے اور کرفیو میں بھی سختی سےعمل کر رہی ہے۔
احمد آباد کے وال سیٹی ایریا میں کورونا وائرس پر قابو پانے کے لیے گزشتہ دنوں وجے روپانی نے میٹنگ کا بھی اہتمام کیا تھا جس میں 21 اپریل تک عوام کے حق کے لیے کرفیو لگایا گیا تھا ایسے میں اب 24 اپریل کو ماہ رمضان کی شروعات ہونے کی وجہ سے کرفیو میں توسیع نہ کرنے کی گزارش کی ہے
انہوں نے مزید لکھا ہے کہ میں یقین دہانی دلاتا ہوں کہ رمضان کے دوران بھی عوام لاک ڈاؤن پر مکمل عمل کریں گے.
انھوں نے اس کے علاوہ مطالبہ کیا کہ رمضان کے دوران تیز دھوپ میں لوگوں کو ضروریات زندگی کی اشیاء خریدنے کے لیے دوپہر ایک سے چار بجے میں نکلنا نہ پڑے اس کے لیے صبح کا کوئی وقت طے کیا جائے۔
