احمدآباد: مائناریٹی کوآرڈینیشن کمیٹی گجرات کے ایک وفد نے گاندھی نگر میں گجرات کے اسٹیٹ پولس کے ڈائریکٹر جنرل کے دفتر کا دورہ کر مطالبہ کیا کہ احمدآباد میں سونل روڈ پر نئی پولس چوکی کا تعمیراتی کام کو روکا جائے اور اس کی جگہ پر چھوٹے بچوں کے لیے کھیل کا میدان بنایا جائے۔
اس سلسلے میں مائناریٹی کارڈیشن کمیٹی گجرات کے کنوینر مجاہد نفیس نے ایک پریس ریلیز میں بتایا کہ احمدآباد شہر میں ایک جوہاپورا نام کا علاقہ ہے، یہ علاقہ مسلم اکثریتی علاقہ ہے اور پُرامن علاقہ ہے، اس علاقے میں سونل روڈ پر سونل سنیما کے سامنے ایک کھلی جگہ تھی۔ پہلے سے ہی علاقے کے آس پاس پولیس اسٹیشن موجود ہیں لیکن علاقے میں 2 سے 3 کلومیٹر تک ایک بھی کھیل کود کا میدان موجود نہیں ہے، یہاں کوئی سرکاری ہیلتھ سب سینٹر نہیں ہے اور نہ ہی ای سی سی پالیسی کے مطابق کوئی آنگن واڑی سینٹر ہے۔
مزید پڑھیں: Mob Lynching: احمدآباد میں مدرسہ کے طالب علم ہجومی تشدد کے شکار- مالیگاؤں 2008 بم دھماکہ معاملہ: مسلم گواہ پر ہندو ملزمین کے خلاف گواہی دینے کا الزام
ایسے میں جوہاپورا علاقے کے بچوں کے لئے کھیل کا میدان مہیا کرائے جانے کی جگہ پولس چھاؤنی بناکر بچوں کے دل میں اور وہاں کے لوگوں میں خوف کا ماحول پیدا کیا جارہا ہے؟
ہماری درخواست ہے کہ اس سرکاری جگہ پر بچوں کے لئے کھیل میدان، گورنمنٹ ہیلتھ سب سینٹر، آنگن واڑی سینٹر بنایا جائے جس سے علاقے کے لوگوں کو فائدہ پہنچ سکے۔
