نئی دہلی: ٹیلی کام ریگولیٹر ٹرائی نے بھارتیہ ایئر ٹیل اور ووڈافون کے ایسے پلان کو بلاک کردیا ہے جس سے صارفین کے درمیان تفریق کے خدشات کا اظہار کیا جارہا ہے۔
ٹرائی کے ذرائع نے آج بتایا کہ ان پلان میں صارفین کو زیادہ ڈاٹا اسپیڈ اور ترجیحی خدمات کا آفر دیا جارہا ہے۔ واضح رہے کہ سستی شرحوں پر تیز ڈاٹا اسپیڈ دینے کے سلسلے میں ٹیلی کام کمپنیوں کے درمیان زبردست مقابلہ آرائی کی وجہ سے آمدنی میں آئی کمی کو دور کرنے کے لیے کمپنیاں ایسے پلان کو پیش کررہی ہیں جس میں صارفین کو بہتر اور ترجیحی خدمات دینے کا وعدہ کیا جارہا ہے۔
ذرائع نے بتایا کہ اس طرح کے پلان سے صارفین کو خدمات مہیا کرانے کے قواعد کی خلاف ورزی ہورہی ہے اور ایسے صارفین کی خدمات متاثر ہوسکتی ہیں جو ان پلان سے باہر ہیں۔ ایئرٹیل نے گزشتہ چھ جولائی کو اس پلان کا اعلان کیا تھا جس میں 499 روپے میں تیز ڈاٹا اسپیڈ دینے اور گاہکوں کو ترجیحی بنیاد پر سروس مہیا کرنے کا وعدہ کیا گیا ہے۔
