نئی دہلی: ایمپلائز پروویڈنٹ فنڈ آرگنائزیشن (ای پی ایف او) کے سینٹرل بورڈ آف ٹرسٹی نے ملازمین کے پروویڈنٹ فنڈ (ای پی ایف) میں شیئر ہولڈروں کے حصص پر مالی برس 2020-21 کے لیے 8.50 فیصد کی شرح سود کی ادائیگی کی سفارش کی ہے۔
مرکزی وزارت محنت و روزگار نے جمعرات کے روز یہاں بتایا کہ بورڈ کا 228 واں اجلاس مرکزی وزیر محنت و روزگار سنتوش کمار گنگوار کی زیر صدارت میں جموں و کشمیر کے سری نگر میں منعقد ہوا۔ اجلاس میں مالی برس 2020-21 کے حصص یافتگان کے جمع شدہ رقم پر 8.50 فیصد سود ادا کرنے کی سفارش کی گئی ہے۔ اس اجلاس میں وزارت سکریٹری اپوروا چندر اور ممبر سکریٹری سنیل برتھوال اور سنٹرل پروویڈنٹ فنڈ کمشنر بھی موجود تھے۔ مرکزی حکومت ای پی ایف شرح سود کا نوٹیفکیشن جاری کرے گی۔ ای پی ایف او نے مالی برس 2019-20 کے لیے ای پی ایف کے سود کی شرح 8.65 فیصد سے کم کرکے 8.5 فیصد کردی تھی۔
کورونا وائرس کی عالمی وبا کی وجہ سے ای پی ایف او کی طرف سے سود کی شرحوں میں کمی کی توقع کی جارہی تھی اور ای پی ایف او کے اس فیصلے سے تقریباً 60 ملین شیئر ہولڈروں کو منافعہ بڑھنے سے اس بار بھی مایوسی ہاتھ لگے گی۔
یو این آئی
