نئی دہلی: خام تیل برآمد کرنے والے ممالک کی تنظیم (اوپیک) کی طرف سے عالمی پیداوار میں تخفیف کا عزم ظاہر کیے جانے کے بعد جمعہ کے روز بین الاقوامی منڈی میں خام تیل کی قیمتوں میں تیزي سے اضافہ ہوا۔
گزشتہ روز اوپیک کے رکن ممالک اور شراکت دار ممالک کے مابین جمعرات کے روز منعقدہ ویڈیو کانفرنس میں انہوں نے عالمی پیداوار میں کٹوتی سے متعلق معاہدے پر اپنے عزم کا اظہار کیا۔ تجزیہ کاروں کے مطابق امریکہ اور چین کے درمیان تعلقات کی تلخی کم ہونے کے اشاروں سے بھی خام تیل کی قیمتوں کوتقویت ملی ہے۔ ذرائع کے مطابق رواں سال کے شروع میں دونوں ممالک کے مابین ہونے والے تجارتی معاہدے پر عمل کرتے ہوئے چین پہلے مرحلے میں امریکہ سے سویا بین، مکئی اور ایتھنول کی درآمدات میں اضافہ کرے گا۔
دریں اثناء، لندن کا برینٹ کروڈ آج 95 سینٹ مہنگا ہو کر 42.46 ڈالر فی بیرل اور امریکی ڈبلیو ٹی آئی ایک ڈالر مضبوط ہوکر 39.95 ڈالر فی بیرل پر آگیا۔
