پردیش کانگریس کے صدر ادھیر رنجن چودھری نے اپنے خط میں لکھا ہے کہ ملک کی دوسری ریاستوں کے مقابلے بنگال میں کورونا ویکسینیشن مہم کی رفتار کم ہے۔
کانگریس کے رہنما کا کہنا ہے کہ مغربی بنگال بڑی ریاستوں میں سے ایک ہے۔ یہاں کی آبادی بھی دوسری ریاستوں کے مقابلے میں زیادہ ہے۔انہوں نے کہا کہ بڑی ریاست ہونے اور آبادی کے اعتبار سے بنگال میں جس رفتار سے کورونا ویکسینیشن مہم ہونی چاہیے اس میں کمی ہے۔
لوک سبھا میں کانگریس کے رہنما نے گورنر جگدیپ دھنکر کے نام اپنے خط میں لکھا ہے کہ بنگال میں روزانہ ایک کروڑ لوگوں کو کورونا ویکسینیشن مہم سے جوڑنا چاہیے۔
کانگریس رہنما کا کہنا ہے کہ گورنر جگدیپ دھنکر کو بی جے پی کی قیادت والی مرکزی حکومت سے اس معاملے میں بات چیت کرنی چاہئے۔ وہ بات چیت کے ذریعہ بنگال کے کورونا ویکسین کے کوٹا میں اضافہ کراسکتے ہیں۔
ادھیر رنجن چودھری کے مطابق وزیراعلیٰ ممتا بنرجی کو گورنر جگدیپ دھنکر سے کورونا ویکسینیشن کے سلسلے میں بات چیت کرنی چاہیے۔انہوں نے کہا کہ ریاستی حکومت کو اس وقت تک کامیابی نہیں مل سکتی جب تک مرکزی حکومت کی مدد حاصل نہ ہو۔انھوں نے مرکزی حکومت کو بنگال کے کورونا ویکسین کے کوٹے میں اضافہ کرنے کا مطالبہ کیا۔
