کرناٹک کے گلبرگہ میں ایس ڈی پی آئی نے گھروں میں ہی رہتے ہوئے احتجاجی مہم کا آغاز کیا ہے جس میں مرکزی حکومت کی جانب سے بھارتی شہریت کےلیے درخواستیں طلب کرنے کے خلاف مظاہرہ کیا جارہا ہے۔
بیان میں بتایا گیا کہ مرکزی حکومت اپنی نا کامیوں کو چھپا نے کےلیے متنازعہ قانون کو نافذ کرنا چاہتی ہے تاکہ اہم مسائل سے لوگوں کی توجہ کو ہٹایا جاسکے۔ ایس ڈی پی آئی نے اس قانون کے خلاف پلے کارڈز و پوسٹر اٹھاکر احتجاجی مظاہرہ کیا ہے۔
شوشیل ڈیموکریٹک پارٹی گلبرگہ ضلع صدر محمد حسین نے کہاکہ وزرات داخلہ کی جانب سے افغانستان، بنگلہ دیش اور پاکستان کے غیرمسلم مہاجرین جو فی الوقت گجرات، راجستھان، چھتیس گڑھ، ہریانہ اور پنجاب کے 13 اضلاع میں رہ ہیں ان سے بھارتی شہریت کےلیے درخواستیں طلب کی ہے۔ وزارت کے اس اقدام کے خلاف شدید احتجاج کیا جائے گا۔
انہوں نے کہا کہ کورونا کی وجہ سے ملک میں حالات انتہائی ابتر ہیں۔ ایسے حالات کےلیے مرکزی حکومت کو ذمہ دار قرار دیا جارہا ہے۔ ان حالات میں بی جے پی عوام کی توجہ اہم مسائل سے ہٹانے کےلیے مودی حکومت نے متنازعہ قانون کا سہارا لیا ہے۔ مرکزی حکومت ملک میں فرقہ وارانہ منافرت بھڑکانے کوشاں ہے۔ انہوں نے عوام مخالف قانون کے خلاف آواز بلند کرنے کی لوگوں کی اپیل کی ہے۔
