ریاست جموں کشمیر کے علٰیحدگی پسندوں کی جانب سے دی جانے والی مشترکہ کال کے پیش نظر وادی میں شہری ہلاکتوں کے خلاف آج مکمل ہڑتال ہے۔
اس ہڑتال کا خاصا اثر وادی کے دیگر اضلاع کے ساتھ ساتھ دارالحکومت سرینگر میں بھی دیکھا جارہا ہے۔
تمام دکانیں اور کاروباری مراکز بند ہیں، سڑکوں سے پبلک ٹرانسپورٹ کی نقل و حمل بھی متاثر ہے، جبکہ تمام تعلیمی سرگرمیاں بھی معطل ہیں۔
انتظامیہ نے شہر کے حساس مقامات پر پولیس اور نیم فوجی دستوں کی اضافی نفری تعینات کی ہے، تاکہ کسی بھی غیر امکانی صورتحال سے نمٹا جاسکے۔
واضح رہے کہ علٰیحدگی پسندوں نے اپنے ایک بیان میں کہا کہ رمضان کے مہینے میں بھی عام انسانی جانوں کے زیاں ہونے کا نہ تھمنے والا سلسلہ وادی کشمیر میں جاری ہے۔
انہوں نے مزید کہا کہ ایک یا دوسرے طریقے سے کشمیری عوام تنازع کشمیر کی قیمت اپنی جانوں سے چکا رہی ہے، جو محض قابل افسوس ہی نہیں بلکہ قابل مذمت بھی ہے۔
انہوں نے ائمہ مساجد اور خطیبوں سے درخواست کی ہے کہ وہ شہری ہلاکتوں کے خلاف آواز بلند کریں۔
