مغربی بنگال کے اولڈ مالدہ کے شاہ پور علاقے سے پولیس نے جماعت المجاہدین بنگلہ دیش کے مبینہ رکن کو گرفتار کرلیا جبکہ دیگر ساتھیوں کی تلاش کی جارہی ہے۔
ذرائع کے مطابق پولیس نے خفیہ اطلاع کی بنیاد پر شاہ پور علاقے میں خصوصی تلاشی مہم چلائی جس میں جے ایم بی کے کارکن کو ایک مکان سے گرفتار کیا گیا۔
پولیس نے گرفتار شخص کی شناخت روبیل الحسن کے طور پر کی ہے جبکہ وہ بنگلہ دیش میں کوکش بازار کے نیا گاؤں کا رہنے والا ہے۔ پولیس نے دعویٰ کیا ہے کہ روبیل الحسن جماعت المجاہدین بنگلہ دیش کا سرگرم رکن ہے۔
پولیس نے مزید بتایا کہ روبیل الحسن، بنگلہ دیش میں مطلوب ہے، اسے وہاں کی پولیس تلاش کر رہی ہے۔ بنگلہ دیش کی پولیس سے بچنے کی غرض سے وہ مالدہ میں گذشتہ 8 دنوں سے روپوش تھا۔ پولیس کی جانب سے مالدہ ضلع میں بھارت-بنگلہ دیش بین الاقوامی سرحد کے قریب گاؤں میں تلاشی مہم چلائی جا رہی ہے تاکہ بنگلہ دیشی تنطیم سے منسلک مزید کارکنوں کو کو گرفتار کیا جاسکے۔
