ریاستی بی جے پی میں جاری اندرونی خلفشار اس وقت سامنے آئی جب مکل رائے نے ایک اجلاس میں شرکت نہیں کی اور بعد میں بتایا کہ انہیں اجلاس کی اطلاع نہیں دیگئی جبکہ ریاستی صدر دلیپ گھوش نے بتایا کہ اجلاس سے متعلق مکل رائے کو دعوت دی گئی تھی۔
اسمبلی انتخابات میں ہار کے بعد سے بی جے پی کی مشکلیں کم ہونے کا نام نہیں لے رہی ہیں۔ بی جے پی کی اندرونی خلفشار اور رہنماؤں کے درمیان نااتتفاقی کے متعدد معاملے سامنے آئے ہیں۔ مکل رائے لگاتار دوسری بار بی جے پی کی میٹنگ سے غیر حاضر رہے۔ قبل ازیں وہ انتخابات نتائج کے فوری بعد ہونے والی اہم میٹنگ میں بھی نہیں گئے تھے۔
آج بی جے پی کے ریاستی صدر دلیپ گھوش نے ریاستی سطح کے بی جے پی رہنماؤں کے ساتھ ایک میٹنگ رکھی تھی جس میں مکل رائے کی غیر موجودگی نے سب کو حیران کر دیا۔ اسمبلی انتخابات میں امید کے مطابق نتائج نہ آنے کے بعد سے ہی بنگال بی جے پی میں کچھ ٹھیک نہیں چل رہا ہے۔ بی جے پی کے متعدد ارکان اسمبلی، ترنمول کانگریس میں شامل ہونے کے کوشاں ہونے کی اطلاعات سامنے آرہی ہیں۔
وہیں ترنمول کانگریس چھوڑ کر بی جے پی میں شامل ہونے والے رہنما بھی پارٹی میں واپس آنا چاہتے ہیں۔ میٹنگ میں غیرحاضری کو لیکر مکل رائے نے کہا کہ انہیں میٹنگ میں نہیں بلایا گیا تھا، اسی لیے وہ نہیں گئے جبکہ دلیپ گھوش نے کہا کہ مکل رائے کو میٹنگ کی اطلاع دی گئی تھی۔ مکل رائے نے مزید کہا کہ ان کی اہلیہ بیمار ہے جس کی وجہ سے میں کافی پریشان ہوں لیکن مجھے اجلاس میں نہیں بلایا گیا۔ وہیں بی جے پی رہنماؤں نے اس بات کی تصدیق کی کہ، چونکہ مکل رائے کے ارکان خاندان کوویڈ سے متاثر ہیں اسی لیے انہیں نہیں بلایا گیا تھا۔
