بھارت کے دارالحکومت دہلی میں عید ملن کی تقریبات منعقد کرنے کا سلسلہ تھمنے کا نام ہی نہیں لے رہا ہے، مسلم جماعتوں کی جانب سے عید ملن کی تقریبات منعقد کرنے کا سلسلہ عید کے ایک ہفتہ گزرجانے کے بعد بھی جاری ہے۔
اس سے قبل جماعت اسلامی نے اپنے دفتر میں تو مولانا محمود مدنی نے 5 ستارہ موریہ ہوٹل میں عید ملن کا پروگرام کیا۔
گزشتہ شب کو مولانا ارشد مدنی کی زیر قیادت جمعیت علماء ہند نے دہلی کے سب سے مہنگے اور وی آئی پی ہوٹل اشوکا میں میں ہائی پروفائل عید ملن کی تقریب کا اہتمام کیا۔
جس میں مختلف شعبہ ہائے زندگی سے وابستہ شخصیات، سفراء، سیاستداں اور علماء و دانشوران سمیت صحافیوں نے شرکت کی۔
اس تقریب میں سابق نائب صدر جمہوریہ حامد انصاری ،سابق وزیر خارجہ سلمان خورشید، سابق وزیر اعلی بھوپیندر سنگھ ہڈا،سابق مرکزی وزیرکے رحمن خان، شرد یادو، آر ایل ڈی کے صدر چودھری اجیت سنگھ سمیت مختلف ممالک کے سفراء نظر آئے۔
راجستھان کے وزیر اعلی اشوک گہلوت نے عین موقع پر شرکت کرنے سے معذرت کردی۔ کانگریس کے منی شنکر ایر بھی شامل ہوئے لیکن مودی حکومت کے کسی اہم وزیر نے اس تقریب میں شرکت نہیں کی۔
