کھجور اور خشک میوہ جات کی مانگ میں اضافہ

رمضان کا انتظار نہ صرف مسلمانوں میں بلکہ غیر مسلمانوں میں بھی رہتا ہے، اس ماہ مقدس میں کھجور،پھل، ڈرائی فروٹس سمیت لذیذ کھانے کی ڈشیں بازار کی رونق ہوتی ہیں۔

ریاست کرناٹک میں شہر بنگلور کے رسیل مارکیٹ ایک تاریخی بازار ہے۔ جو خاص کر مختلف اقسام کے پھل و ڈرائی فروٹس کے لیے مشہور ہے اور اس سال رمضان المبارک کے موقع پر یہاں تقریباً 40 اقسام کے کھجوریں دستیاب ہیں۔ جن کی قیمت 150روپے سے 3000 روپے فی کلو تک فروخت ہورہی ہیں۔

رسیل مارکیٹ کے دکاندار کافی خوش ہیں کیونکہ اس سال ان کے کاروبار میں زبردست اضافہ ہوا ہے، انہوں نے خریداروں کا خیال رکھتے ہوئے ڈرائی فروٹس پر 20-25 فیصد تک ڈسکاؤنٹ بھی رکھا ہے۔

ڈلیشس فروٹس دکان کے مالک محمد ادریس چودھری نے بتایا کہ ہمیشہ کی طرح ہم دیکھ رہے ہیں کہ غیر مسلم بھائی بھی نہایت ہی شوق سے یہاں کھجوریں اور ڈرائی فروٹس خریدنے آرہے ہیں۔

یاد رہے کہ رمضان المبارک کے ابتداء ہی میں ہائی کورٹ کے حکم کے بعد بنگلور کارپوریشن نے شہر کے غیر قانونی ڈھانچوں کو مسمار کردیا اور اس سلسلے میں رسیل مارکیٹ کی پارکنگ پر بھی پابندی عائد کردی تھی۔ اس ضمن میں رسیل مارکیٹ ٹریڈرس ایسوسی ایشن کی پولیس جوائنٹ کمیشن سے بات چیت کے بعد عارضی طور پر مسئلہ کا حل نکالا ہے اور رمضان المبارک تک یہ پارکنگ کو بحال کردیا ہے جس سے تاجروں میں راحت ہے۔