سنہ 2015 میں معروف فلم اداکار عامر خان کی فلم 'دنگل' سے اپنے فلمی کیریئر کا آغاز کرنے والی زائرہ وسیم کا کہنا ہے کہ وہ اپنی زندگی میں برکت کھو رہی تھی، ایمان متاثر ہورہا تھا اور مذہب کے ساتھ تعلقات خطرے میں پڑ گئے تھے۔
18 سالہ زائرہ وسیم جنہوں نے اپنے مختصر فلمی کیریئر کے دوران تین بالی ووڈ فلموں 'دنگل'، 'سیکرٹ سپر سٹار' اور 'دی سکائی از پنک' میں اپنی اداکاری کے جوہر دکھائے ہیں۔
انہوں نے فلمی کیریئر سےسبکدوشی اختیار کرنے کا اعلان اپنے سوشل میڈیا اکاؤنٹ پر اپنی ایک طویل تحریر میں کیا ہے۔
انہوں نے اپنے فیصلے کو صحیح ثابت کرنے کے لیے قرآن کی متعدد آیات، پیغمبر اسلام حضرت محمد مصطفی صلی اللہ علیہ و آلہ وسلم و خلیفہ دوم حضرت عمر بن خطاب کے اقوال کا سہارا لیا ہے۔
زائرہ وسیم جو اب تک بالی وڈ کے متعدد بڑے ایوارڈ جیسے فلم فیئر اور نیشنل فلم ایوارڈ حاصل کرچکی ہیں، ان کے بالی ووڈ سے سبکدوشی اختیار کرنے کے اچانک فیصلے نے سوشل میڈیا پر طوفان کھڑا کردیا ہے۔
