جھارکھنڈ میں پیش آئے تبریز انصاری کی ماب لنچنگ کا معاملہ ابھی تھما بھی نہیں تھا کہ بریلی پیسنجرٹرین میں سوار مدرسے کے طالب علم حافظ محمد فرمان نیازی کو بری طرح سے مارا پیٹا گیا۔
حافظ محمد فرمان نیازی(مجیب الرحمن) علی گڑھ میں بلاب نگر علاقے کے قاسم پور پاور ہاوس کے پاس رہنے والے ہیں اور بریلی کے خواجہ قطب علاقے میں مدرسہ خانقاہ عالیہ نیازیہ عزیزالعلوم میں دینی تعلیم حاصل کررہے ہیں، اس واقعہ کو کیس بھی بریلی میں ہی درج کرایا گیا ہے۔
بتایا جارہا ہے کہ متاثر فرمان نیازی چھٹیاں ختم ہونے پر اپنے گھر سے واپس مدرسے کے لیے بریلی پیسنجر میں سفر کررہا تھا آگے راج گھاٹ نورورا اسٹیشن کے پاس چند لوگ ٹرین میں گھس آئے اسے دیکھ کر اسلام کے خلاف قابل اعتراض تبصرہ کرتے ہوئے پہلے اس کی ٹوپی ٹرین سے باہر پھینک دی۔
اور اس کے بعد فرحان نیازی کے ساتھ بے دریغ پٹائی کی گئی اور اس کے کپڑے تک پھاڑ دیے گئے اور اس کا چشمہ بھی توڑ دی اس دوران فرحان کی حالت اتنی غیر ہوگئی تھی کی وہ بے ہوش ہوگیا۔
اگلے دن جب اسے ہوش آیا تو اس نے اپنے آپ کو کھیر کے کسی جنگل میں پڑا پایا جہاں کی مقامی خواتین نے اس پر پانی ڈال کراسے ہوش میں لانے کی کوشش کی اور پھر ان لوگوں نے فرحان کو آدھار کارڈ کی بنأ پر اسے علی گڑھ کی ٹرین میں بیٹھا دیا، جہاں پہنچ کر اس نے اپنے گھر والوں کو اس واقعہ کی اطلاع دی۔
اس معاملہ میں متاثرہ فرحان نیازی نے اپنی آپ بیتی کو ایک ویڈیو میں بیان کیا ہے جو سوشل میڈیا پر وائرل ہوگئی۔ فی الحال فرحان نیازی کو واپس بریلی مدرسہ میں بھیج دیا گیا ہے۔
حالانکہ اس معاملہ میں ایس ایس پی آکاش کلہری کا کہنا ہے کہ' یہ معاملہ ماب لنچنگ کا نہیں بلکہ زہر خورانی کا ہے، 18 مئی کو علی گڑھ سے بریلی جاتے وقت فرحان کا چند لوگوں کے ساتھ تنازعہ ہوا اور پھر ان لڑکوں نے اسے کچھ سونگھا کر بے ہوش کردیا۔
ایس ایس پی نے زہر خورانی و چوری کا مقدمہ درج کر تحقیقات شروع کردی ہے۔
