ریاست بہار کے ضلع چھپرا میں بنیاپور میں رہنے والے چوبیس سالہ متھلیش پرساد کو بھی ہوا میں اڑان بھرنے کی خواہش تھی۔ وہ بچپن سے چاہتے تھے کہ ایک ہیلی کاپٹر بنائیں جس میں وہ اڑ سکیں۔ وہ یہ بات جانتے تھے کہ یہ کام ان کے لیے بہت مشکل ہے پر انھوں نے ہار نہیں مانی۔
خواب کو حقیقت میں بدلنے کے لیے متھلیش نے اپنی نینو کار کو ہی ہیلی کاپٹر کی شکل دے دی۔ پیشے سے پلمبر متھلیش اور ان کے بھائی نے کام کرتے کرتے ایک نینو خریدی اور اس گاڑی کو ہیلی کاپٹر کی شکل میں بدل ڈالا۔
بھلے ہی یہ کار ہوا میں نہیں اڑ سکتی لیکن جن لوگوں کے سامنے سے گزرتی ہے تو لوگ حیرت میں پڑ جاتے ہیں۔
متھلیش کو اس کار کی باڈی بنانے میں تقریباً 7 ماہ کا وقت لگا اور اسے جاذب نظر بنانے کے لیے اس پر 7 لاکھ روپے خرچ کیے۔
ہیلی کاپٹر کی طرح نظر آنے والی اس کار میں بس ایک کمی ہے کہ یہ اڑ نہیں سکتی لیکن لوگوں کی نظر جب اس پر پڑتی ہے تو وہ حیران ہوئے بنا نہیں رہ پاتے۔
