کشن گنج حلقہ پارلیمان سے اخترالایمان مجلس اتحاد المسلمین کے امیدوار ہیں۔ اخترالایمان کشن گنج اور کوچادھامن کے رکن اسمبلی رہ چکے ہیں۔
انہوں نے سیاسی کریر کی شروعات راشٹریہ جنتا دل سے کی تھی بعد میں نتیش کا دامن تھام کر جے ڈی یو میں چلے آئے تھے اور انہیں کی پارٹی سے سال 2014 میں لوک سبھا الیکشن کے لئے نامزد بھی ہوئے تھے لیکن الیکشن سے چند دن قبل کانگریسی امیدوار مولانا مرحوم اسرارالحق قاسمی صاحب کی حمایت کے بعد خود کو الگ کر لئے تھے۔
اخترالایمان اس بار مجلس اتحاد المسلمین کی ٹکٹ پر انتخاب لڑ رہے ہیں اور کافی مضبوط امیدوار سمجھے جاتے ہیں۔ خود اسد الدین اویسی صاحب اپنی پوری ٹیم کے ساتھ یہاں انتخابی مہم چلا رہے ہیں۔
آج کشن گنج حلقہ کے بیسہ بلاک میں سیاسی ریلی سے خطاب سے پہلے نمائندہ ائی ٹی بھارت نے بیرسٹر اسدالدین اویسی سے سیمانچل کی تعلیمی، سیاسی، سماجی اور اقتصادی حالات پر خصوصی گفتگو کی۔
سیمانچل کے حالات کو بہتر بنانے کے لیے اویسی نے آرٹیکل 371 کے نافذ کرنے پر زور دیا۔ ساتھ ہی انہوں نے نتیش اور مودی کی جوڑی کو لیلیٰ مجنوں کی جوڑی بتاتے ہوئے شدید نکتہ چینی کی۔
بیرسٹر اویسی نے دیگر مختلف موضوعات پر بھی اپنے خیالات کا اظہار کیا۔
