ہریانہ کے ہسار میں 5ویں ایلیٹ خواتین کی باکسنگ چمپیئن شپ اختتام پذیر ہوگئی۔ جہاں 52 کلوگرام کے زمرے میں تلنگانہ کی نکہت زرین نے ہریانہ کی میناکشی کو 1-4 سے شکست دے کر گولڈ میڈل جیتا۔ نکہت زرین نے رِنگ میں انتہائی عمدہ کارکردگی کا مظاہرہ کیا اور گولڈ میڈل کے ساتھ ساتھ چمپیئن شپ 2021 کی بہترین باکسر کا ایوارڈ بھی حاصل کیا۔
نکہت
ملک کی بہترین باکسر 2021 کا ایوارڈ جیتنے والی قومی چمپیئن اور گولڈ میڈلسٹ نکہت زرین نے ای ٹی وی بھارت سے بات کرتے ہوئے کہا کہ اس چمپیئن شپ میں ان کے لیے بہت سارے چیلنجز تھے۔ فائنل میچ بھی میزبان ہریانہ سے تھا۔
نکہت نے پہلی بار نیشنل چمپیئن شپ میں گولڈ میڈل جیتا ہے، اس لیے یہ گولڈ ان کے لیے بھی بہت خاص ہے۔ نکہت کا کہنا ہے کہ سال کا آغاز بہت اچھا ہوا، اب میں عالمی چمپیئن شپ میں تمغہ جیتنے کی پوری کوشش کروں گی۔
گولڈ میڈل جیتنے والی نکہت زرین نے اعتراف کیا کہ کورونا کی وجہ سے تمام کھلاڑیوں کی فٹنس بہت متاثر ہوئی ہے۔
- مزید پڑھیں:ہریانہ کے نوح میں T10 کرکٹ کیلئے ٹرائل آج
انہوں نے کہا کہ لاک ڈاؤن کے دوران گھر میں رہ کر بہت مشق بھی کی لیکن اگر آپ کچھ لینے کے لیے بھوکے ہیں تو آپ کو کوئی نہیں روک سکتا۔ نکہت نے کہا کہ مجھے نیشنل چمپیئن بننے کی بھوک تھی۔ اب میرا ہدف عالمی چمپیئن شپ میں بھارت کے لیے گولڈ میڈل جیتنا ہے۔
