شمالی کشمیر کے ضلع بانڈی پورہ کا ایک دور افتادہ گاؤں ووین ملک کا پہلا گاؤں بن گیا ہے جس کی 15 برس اور اس سے زیادہ عمر کی پوری آبادی کورونا ویکسینشن کر دئے گئے ہیں۔Weyan Village Vaccinated
ضلع صدر مقام سے 28 کلومیٹر دور مشہور ہرمکھ چوٹیوں کے دامن میں واقع ووین تک پہنچنے کے لئے طبی عملے کے اہلکاروں کو قریب چودہ کلو میٹر کی مسافت پیدل طے کرنی پڑی تاکہ کم عمر نوجوان لڑکے اور لڑکیوں کی ویکسینیشن کو ممکن بنایا جا سکے۔
ووین 170 کنبوں پر مشتمل گاؤں ہے جہاں گجر برادری کے لوگ آباد ہیں اور اس گاؤں میں ابھی بھی قریب چار فٹ برف جمع ہے۔
بلاک میڈیکل آفیسر بانڈی پورہ ڈاکٹر مسرت اقبال نے کہا کہ اس گاؤں کا ضلع صدر مقام کے ساتھ کوئی رابطہ سڑک نہیں ہے اور نہ کمیونکیشن کا کوئی بندوبست ہے۔ انہوں نے کہا کہ ہمیں بانڈی پورہ سے ایک طبی ٹیم کو روانہ کرنی پڑی جس نے وہاں 56 نوجوانوں کو ویکسین لگائے۔
افسر نے کہا کہ طبی عملے کو وہاں پیدل جانا پڑا اور انہوں نے تین دن گاؤں میں ہی قیام کرکے صد فیصد نوجوانوں کی ویکیسنیشن کو ممکن بنا دیا۔ انہوں نے کہا کہ اس گاؤں میں ابھی بھی قریب چار فٹ برف جمع ہے۔
مزید پڑھیں:۔ Covid Cases in JK: جموں و کشمیر میں کورونا بے قابو، ایک دن میں 5992 کیسز درج
ان کا کہنا تھا کہ اس گاؤں کی کل آبادی 362 نفوس پر مشتمل ہے اور سال 2021 میں ہی اٹھارہ سال کی عمر سے اوپر کی آبادی کو ویکسین لگا دئے گئے ہیں۔ ڈاکٹر مسرت اقبال نے کہا کہ ہیلتھ اہلکاروں نے ویکیسن کے علاوہ اس بستی کے لوگوں کے کورونا ٹیسٹ بھی کئے۔ انہوں نے کہا کہ اس گاؤں کے ایک فرد کا بھی کورونا ٹیسٹ مثبت نہیں آیا۔
قابل ذکر ہے کہ محکمہ صحت کے عہدیداروں کے مطابق جموں وکشمیر ملک کی ریاستوں اور یونین ٹریٹریز میں لوگوں کی ویکیسنیشن کرانے میں صف اول میں ہے۔
(یو این آئی)
