چنڈی گڑھ: پنجاب کے وزیر اعلی بھگونت مان نے ریاست کی سابقہ حکومتوں پر حملہ کرتے ہوئے کہا کہ انہوں نے نوجوانوں کو گمراہ کیا جبکہ ان کی حکومت نے 26,797 سے زیادہ نوجوانوں کو ریاست کی سماجی و اقتصادی ترقی میں سرکاری نوکریاں دے کر فعال حصہ دار بنایا ہے۔منگل کو یہاں نئے بھرتی ہونے والے جانوروں کے ڈاکٹروں کو تقرری کے خطوط سونپنے کے بعد ایک جلسہ عام سے خطاب کرتے ہوئے مان نے کہا کہ بھرتی کا یہ پورا عمل شفاف طریقے سے صرف میرٹ کی بنیاد پر مکمل کیا گیا ہے۔ اب یہ نوجوان حکومت کا اٹوٹ انگ بن چکے ہیں اور انہیں پورے جذبے کے ساتھ عوام کی خدمت کرنی چاہیے۔انہوں نے کہا کہ صرف 11 مہینوں میں اتنی بڑی تعداد میں ملازمتوں کا پیدا ہونا نوجوانوں کی فلاح و بہبود اور ان کے لیے روزگار کے نئے مواقع کھولنے کے تئیں ریاستی حکومت کے عزم کو ظاہر کرتا ہے۔
وزیراعلیٰ نے کہا کہ ان کی حکومت کا واحد مقصد نوجوانوں کی بے پناہ طاقت کو تعمیری انداز میں بروئے کار لانا ہے۔ پنجاب کو ملک کی نمبر ون ریاست بنانے کے ہدف کو پورا کرنا وقت کی اہم ضرورت ہے۔ ان کی حکومت ریاست کی سابقہ شان کو بحال کرنے کے لیے مستقبل کی منصوبہ بندی کر رہی ہے۔ ان کی حکومت نے کنٹریکٹ پر کام کرنے والے 14 ہزار ملازمین کی خدمات کو ریگولرائز کیا ہے اور کابینہ نے اتنے ہی دوسرے ملازمین کی خدمات کو بھی ریگولر کرنے کی منظوری دے دی ہے۔ یہ پہلا موقع ہے کہ پنجاب پولیس نے 2100 آسامیوں پر بھرتی کا اعلان کیا ہے اور فیصلہ کیا گیا ہے کہ آئندہ چار سالوں کے دوران ہر سال کانسٹیبلز کی 1800 اور سب انسپکٹرز کی 300 آسامیاں پُر کی جائیں گی۔ حکومت نوجوانوں کے لیے روزگار کے نئے مواقع پیدا کرنے کے لیے صنعتی ترقی کو تیز کرنے پر بھی توجہ دے رہی ہے۔ بھگنت مان نے کہا کہ حکومت جلد ہی 'سرکار آپ کے دوار' پروگرام شروع کرنے کا منصوبہ بنا رہی ہے، جس کے تحت ریاست کے باشندوں کو ان کی دہلیز پر 40 شہری مرکوز خدمات فراہم کی جائیں گی۔ یہ اسکیم ایک ایپ کے ذریعے آن لائن دستیاب ہوگی اور شہریوں کو صرف ایک فون کال کے ذریعے پریشانی سے پاک خدمات حاصل ہوں گی۔
یو این آئی
