پیلی بھیت: بھارتیہ جنتا پارٹی (بی جے پی) کے رکن پارلیمنٹ ورون گاندھی نے بدھ کو کہا کہ ووٹ کی طاقت اور اہمیت کو سمجھ کر ملک کے مفاد میں ووٹ دینا چاہیے۔ لالچ میں ووٹ ڈالنے سے نہ صرف بدعنوانی بڑھتی ہے بلکہ یہ ملک سے غداری کے مترادف ہے۔ اپنے پارلیمانی حلقے کے ایک روزہ دورے پر آئے ورون گاندھی نے لالوریکھیڑا اور امریہ بلاک میں منعقدہ عوامی پروگرام میں کہا، ''ہمارے آباؤ اجداد نے ملک کی آزادی کے لیے جنگ لڑی تھی۔ اس میں تقریباً ایک کروڑ لوگ شہید ہوئے تھے۔ ذرا سوچئے، کیا آج ہمیں ان کی قربانی کا احساس ہے؟ کیا آج ہم اپنے طرز عمل اور اپنی سیاست سے ان کے خواب پورے کر رہے ہیں؟ ایسا اس لیے ہو رہا ہے کہ ہم اپنے لالچ میں ووٹ اور ووٹ کی اہمیت کو نہیں سمجھتے۔ ہمارا ووٹ کوئی عام ووٹ نہیں ہے، اپنی روح کو بیدار کریں اور خود سے وعدہ کریں کہ آئندہ ہم ووٹ کی طاقت اور اہمیت کو سمجھیں گے اور ووٹ صرف ملک کے مفاد میں دیں گے۔ لالچ سے ووٹ دینے سے نہ صرف بدعنوانی بڑھتی ہے بلکہ یہ ملک کے ساتھ غداری ہے۔ Varun Gandhi On Voter
انہوں نے کہا کہ ہندو مسلم سیاست ملک کے لیے اچھی نہیں ہے۔ ہمیں ایسی سیاست کو سمجھنا ہوگا جو ترقی کے لیے نہیں بلکہ غربت، بے روزگاری، بدعنوانی سے لوگوں کی توجہ ہٹانے کے لیے کی جارہی ہے۔ ہندو مسلم کی باتوں میں الجھ کر ملک کو ترقی کی راہ پر گامزن نہیں کیا جا سکتا۔ ہمیں سب کو ساتھ لے کر چلنا ہے اور ایسے کام کرنے ہوں گے جن سے ہمارے ملک کا پرچم بلند ہو۔ ملک آپ کے کندھوں پر چل رہا ہے، اس لیے کبھی بھی ملک کا جھنڈا نیچے نہ ہونے دینا۔ ورون گاندھی نے کہا کہ ہندو، سکھ، مسلمان سب ایک ہیں۔ انہوں نے سوال کیا کہ کیا مسلمان اور سکھ اولمپکس میں تمغے نہیں لاتے؟ مذہب اور سیاست میں کوئی مماثلت نہیں ہے۔ سیاست ملک کی ترقی کے لیے ہے اور اسے آگے لے جانے کے لیے ہے اور مذہب اپنی ثقافت کی حفاظت کے لیے ہوتے ہیں۔
یو این آئی
