بجرنگ پونیا پر ہر ہندوستانی کو فخر ہے: مودی

وزیر اعظم نریندر مودی سمیت نائب صدر جمہوریہ ایم وینکیا نائیڈو نے ہندوستانی پہلوان بجرنگ پونیا کو ٹوکیو اولمپکس میں کانسی کا تمغہ حاصل کرنے پر مبارکباد پیش کی ہے۔

وزیر اعظم نریندر مودی نے ٹوکیو اولمپکس میں شاندار کارکردگی کا مظاہرہ کرکے کشتی کے مقابلے میں کانسی کا تمغہ حاصل کرنے والے پہلوان بجرنگ پونیا کو مبارکباد دیتے ہوئے کہا ہے کہ ’’ہر ہندوستانی کو ان پر فخر ہے۔‘‘

وزیر اعظم نے ہفتہ کو ایک ٹویٹ میں کہا ’’ٹوکیو سے بڑی خوشخبری آئی ہے۔ بجرنگ پونیا نے بہت بڑا مقابلہ کیا۔ اس کامیابی کے لیے نیک خواہشات۔ اس سے ہر ہندوستانی خوشی اور فخر محسوس کر رہا ہے۔‘‘

قابل ذکر ہے کہ بجرنگ پونیا نے فری سٹائل ریسلنگ کے 65 کلوگرام کے زمرے میں قزاخستان کے ایک پہلوان کو شکست دے کر کانسی کا تمغہ حاصل کیا ہے۔

نائب صدر جمہوریہ ایم وینکیا نائیڈو نے بھی ہندوستانی پہلوان بجرنگ پونیا کو ٹوکیو اولمپکس میں کانسی کا تمغہ حاصل کرنے پر مبارکباد دی ہے۔

ہفتہ کے روز جاری کیے گئے ایک پیغام میں نائیڈو نے کہا کہ ’’بجرنگ پونیا کی کارکردگی نوجوان کھلاڑیوں کو متاثر کرے گی۔‘‘