آج صدر جمہوریہ ہند رام ناتھ کووند اتر پردیش کے ضلع پریاگ راج کا دورہ کریں گے جہاں وہ اترپردیش نیشنل لاء یونیورسٹی اور الہ آباد ہائی کورٹ کی عمارت کے نئے احاطہ کا سنگ بنیاد رکھیں گے۔
صدر جمہوریہ الہ آباد ہائی کورٹ میں منعقدہ پروگرام میں شرکت کے لیے صبح 11 بجے بمرولی ایئر پورٹ پہنچیں گے، جہاں ریاست کی گورنر آنندی بین پٹیل اور وزیراعلی یوگی آدتیہ ناتھ صدر کا استقبال کریں گے۔ اس کے ساتھ ہی ملک کے چیف جسٹس اور وزیر قانون کرن رجیجو اور ریاست کے وزیر قانون برجیش پاٹھک بھی پروگرام میں شرکت کریں گے۔
وہیں صدر جمہوریہ ہند رام ناتھ کووند کے دورے کے پیش نظر سکیورٹی کے سخت سکیورٹی انتظامات کئے گئے ہیں جگہ جگہ پولیس فورس کو کثیر تعداد میں تعینات کیا گیا ہے، سکیورٹی کے پیش نظر بمرولی ایئر پورٹ کے آس پاس کے علاقوں میں پولیس کی گشتی نے اعلان عام کرایا ہے کہ اگر کسی کے گھر میں کوئی غیر ملکی مہمان قیام پزیر ہو تو وہ اپنے قریبی پولیس اسٹیشن میں اسکی اطلاع دے۔
مزید پڑھیں:۔ صدر رام ناتھ کووند کشمیر یونیورستی کنووکیشن کی صدارت کریں گے
ہائی کورٹ میں منعقدہ اس پروگرام میں ملک کے وزیر قانون کرن رجیجو کے ہمراہ سپریم کورٹ کے جج بھی شرکت کریں گے۔ اس کے علاوہ ریاستی گورنر آنندی بین پٹیل، وزیر اعلی یوگی آدتیہ ناتھ نیز نائب وزیر اعلیٰ کیشو پرساد موریہ اور وزیر قانون برجیش پاٹھک کے ساتھ دیگر وزراء بھی پروگرام میں شرکت کریں گے۔ الہ آباد ہائی کورٹ میں منعقدہ اس پروگرام میں کورونا پروٹوکول کی مکمل پیروی کی جائے گی۔
