بھارتیہ جنتا پارٹی کی اڈیشہ یونٹ نے ہفتہ کے روز ریاست کے وزیر اعلی نوین پٹنائک کے تمام پروگرامز کے بائیکاٹ کا اعلان کیا اور ان پر اسکول ٹیچر ممتا مہر کو انصاف دلانے میں ناکام ہونے کا الزام لگایا۔ مہر کا اسکول کے صدر گوبند ساہو نے بے دردی سے قتل کر دیا تھا۔
یہ بھی پڑھیں:مودی آئین بھی بدل دیں گے تو کوئی حیرانی کی بات نہیں: دگ وجے
بی جے پی کے ریاستی جنرل سکریٹری پرتھوی راج ہری چندن نے میڈیا کو بتایا کہ 8 نومبر کو وزیراعلیٰ پٹنائک کے ضلع کے مجوزہ دورے کے دوران سماجی بائیکاٹ کالاہانڈی سے شروع ہوگا۔ انہوں نے کہا کہ پٹنائک کا بائیکاٹ تب تک جاری رہے گا جب تک ریاست کے وزیر داخلہ دویا شنکر مشرا کو قتل میں ان کے مبینہ کردار کی وجہ سے ان کے عہدے سے برطرف نہیں کر دیا جاتا ہے اور اس واقعہ کی مرکزی تفتیشی بیورو کو جانچ کا حکم نہیں دیا جاتا۔
ہری چندن نے کہا کہ سینئر بی جے پی لیڈر بسنت پانڈا، کے وی سنگھ دیو اور سریش پجاری کی قیادت میں 8 نومبر کو ضلع کالاہانڈی میں وزیر اعلیٰ کے تمام سماجی پروگراموں کا بائیکاٹ کیا جائے گا۔
یواین آئی
