مہاراشٹرا میں کورونا کے کیسز میں اضافے کے سبب حکومت نے لاک ڈاؤن کا اعلان کیا جس کے بعد عوام سڑکوں پر آ گئے ہیں۔ مالیگاؤں میں سیاسی، سماجی اور ملی تنظیموں نے لاک ڈاؤن کی سخت مخالفت کی اور احتجاج درج کروایا ہے۔
اس تعلق سے شہر کی ایک فعال تنظیم دیویانگ ایجوکیشن اینڈ ویلفیئر سوسائٹی نے بھی لاک ڈاؤن کے خلاف علامتی احتجاج کیا۔
دیویانگ سوسائٹی جہاں شہر کے معذوروں کے ساتھ شانہ بشانہ کھڑی ہے وہیں، شہر کی ملی تنظیموں کے ساتھ اپنا احتجاج بھی درج کرواتی رہی ہے۔
مالیگاؤں میں مکمل لاک ڈاؤن کے دوران صرف ایمرجنسی و ضروری خدمات جاری رکھنے کے اعلان کے بعد دیویانگ سوسائٹی کے صدر مدثر رضا نے سخت الفاظ میں مذمت کرتے ہوئے کہا کہ مکمل لاک ڈاؤن کی وجہ سے غریبوں کو کافی پریشانیوں کا سامنا کرنا پڑے گا۔
ایسے حالات میں جہاں ہاتھ پاؤں سے سلامت ایک اچھا خاصا انسان ہے وہ بھی پریشان ہے تو ایک معذور شخص کا کیا حال ہوگا۔ اس لیے حکومت کو چاہیے کہ وہ ان پریشانیوں کو ذہن میں رکھ کر لاک ڈاؤن جیسے فیصلے پر نظر ثانی کرے۔
انہوں نے بتایا کہ اس علامتی احتجاج میں سوسائٹی کی ورکنگ کمیٹی کے تمام ممبران ہاتھوں میں فائل لے کر حکومت کو یہ بتانا چاہیے ہیں کہ ان کے مطالبات صرف بھارت ہی نہیں بلکہ اقوام متحدہ تک پہنچائے گئے ہیں۔
