نئی دہلی: سپریم کورٹ نے سابق وزیر اعظم راجیو گاندھی کے قتل معاملہ میں عمر قید کی سزا کاٹ رہے مجرمین میں سے ایک مجرم پیراریوالن کو رہا کرنے کا حکم دیا ہے۔ پیراریوالن 30 سال سے زیادہ عرصے سے جیل میں ہیں۔ جسٹس ایل ناگیشور راؤ کی سربراہی والی بنچ نے آرٹیکل 142 کے تحت اپنے استحقاق کا استعمال کرتے ہوئے پیراریولن کی رہائی کا حکم دیا۔ بنچ نے کہاکہ "ریاستی کابینہ نے کافی غور و فکر کرنے کے بعد اپنا فیصلہ سنایا تھا۔ آرٹیکل 142 کا استعمال کرتے ہوئے قصورواروں کو رہا کرنا مناسب ہوگا۔ آئین کا آرٹیکل 142 سپریم کورٹ کو مراعات دیتا ہے، جس کے تحت اس کا فیصلہ اس وقت تک انتہائی اہمیت کا حامل سمجھا جاتا ہے جب تک کہ متعلقہ معاملے میں کوئی دوسرا قانون نافذ نہ ہو۔ سابق وزیر اعظم راجیو گاندھی کے قاتل اے جی پیراریولن کو عدالت نے 9 مارچ کو ضمانت دی تھی جب یہ مشاہدہ کیا گیا تھا کہ سزا اور پیرول کی سزا بھگتنے کے دوران ان کے طرز عمل سے متعلق کوئی شکایت موصول نہیں ہوئی تھی۔ Supreme Court orders release of convict in Rajiv Gandhi assassination case
سپریم کورٹ 47 سالہ پیراریولن کی درخواست پر سماعت کر رہی تھی جس میں 'ملٹی ڈسپلنری مانیٹرنگ ایجنسی' (MDMA) کی طرف سے تحقیقات مکمل ہونے تک ان کی عمر قید کی سزا کو معطل کرنے کی درخواست کی گئی تھی۔ اس سے قبل 4 مئی کو بھی سپریم کورٹ کے جسٹس ایل این راؤ اور جسٹس بی آر گاوائی کی بنچ نے اے جی پیررولن کی رہائی سے متعلق درخواست کی سماعت کی تھی۔
واضح رہے کہ راجیو گاندھی کو 21 مئی 1991 کی رات تمل ناڈو کے سری پیرنبدور میں ایک خودکش بمبار خاتون نے قتل کر دیا، جس کی شناخت دھنو کے نام سے ہوئی تھی۔ مئی 1999 کے اپنے حکم میں سپریم کورٹ نے چار مجرموں، پیراریولن، موروگن، سنتھم اور نلنی کو سنائی گئی موت کی سزا کو برقرار رکھا تھا۔ 18 فروری 2014 کو سپریم کورٹ نے پیراریولن کی موت کی سزا کو دو دیگر قیدیوں - سنتھن اور موروگن کے ساتھ عمر قید میں تبدیل کر دیا جس کی بنیاد پر مرکز کی طرف سے رحم کی درخواست پر فیصلہ کرنے میں 11 سال کی تاخیر ہوئی۔
