سپریم کورٹ نے کورونا کی وجہ سے مرنے والے افراد کے ڈیتھ سرٹیفکیٹس جاری کرنے کی ہدایات پر عمل درآمد کے لئے مرکزی حکومت کو 11 ستمبر تک کا وقت دیا ہے۔
جسٹس ایم آر شاہ اور جسٹس انیرودھ بوس کی ڈویژن بنچ نے جمعہ کو مرکزی حکومت کی جانب سے پیش ہونے والے سالیسیٹر جنرل تشار مہتہ سے کہا کہ وہ 30 جون کی عدالتی ہدایات پر عمل درآمد کے حوالے سے 11 ستمبر تک حلف نامہ جمع کرائیں۔
واضح ہے کہ 30 جون کو عدالت عظمیٰ نے اپنے رہنما خطوط میں کہا تھا کہ کورونا کی وجہ سے اپنی جان گنوانے والے افراد سے متعلق ڈیتھ سرٹیفکیٹ کے اجراء کے عمل کو آسان بنانے کا راستہ تلاش کریں۔
یہ بھی پڑھیں: جموں و کشمیر میں کالج اور یونیورسٹیز جلد کھول دیے جائیں گے: منوج سنہا
آج ہونے والی سماعت کے دوران ڈویژن بنچ نے مرکزی حکومت کی جانب سے متعلقہ حلف نامہ جمع نہ کرانے پر شدید ناراضگی کا اظہار کیا ، جس کے بعد مسٹر مہتہ نے مزید ایک ہفتہ کا وقت طلب کیا۔
واضح رہے کہ 16 اگست کو ہونے والی سماعت کے دوران عدالت نے اپنی ہدایات پر عمل درآمد کے لیے 3 ستمبر (آج) تک کا وقت دیا تھا لیکن مرکز اس میں ناکام رہا۔
یہ عذرداری ایڈوکیٹ گورو بنسل نے دائر کی ہے۔
یو این آئی
