نئی دہلی: پارلیمنٹ کا خصوصی اجلاس 18 ستمبر سے شروع ہوگا جو 22 ستمبر تک جاری رہے گا۔ پارلیمنٹ کا یہ خصوصی اجلاس اس بار نئے پارلیمنٹ ہاؤس میں ہونے جا رہا ہے۔ تاہم سیشن کے پہلے دن کا آغاز پرانی عمارت میں ہوگا، لیکن بعد میں بقیہ سیشنوں کو گنیش چترتی کے موقع پر 19 ستمبر کو نئی عمارت میں منتقل کر دیا جائے گا۔ ذرائع کے مطابق ابھی تک اس حوالے سے کوئی باضابطہ اطلاع نہیں آئی ہے۔ تاہم تیاریوں اور بحث کی وجہ سے کہا جا رہا ہے کہ 18 ستمبر کو پارلیمنٹ کا خصوصی اجلاس پرانی عمارت سے شروع ہوگا۔ پارلیمنٹ کی نئی عمارت میں 19 ستمبر بروز منگل گنیش چترتھی کے دن کام شروع ہو سکتا ہے۔
واضح رہے کہ نئے پارلیمنٹ ہاؤس کا سنگ بنیاد دسمبر 2020 میں وزیر اعظم نریندر مودی نے رکھا تھا اور اس سال 28 مئی کو مودی نے اس کا افتتاح کیا تھا۔ پارلیمنٹ کی اس نئی عمارت کو ٹاٹا پروجیکٹس لمیٹڈ نے تعمیر کیا ہے اور اس پر 862 کروڑ کی لاگت آئی ہے۔ چونکہ حکومت نئے پارلیمنٹ ہاؤس میں کسی تاریخی اور بڑے کام کے ساتھ کام شروع کرنا چاہتی ہے۔ اسی لیے یہ بحث ہے کہ خواتین ریزرویشن بل، ون نیشن ون الیکشن بل اور یکساں سول کوڈ بل لایا جا سکتا ہے۔ یہ بات بھی زیر بحث ہے کہ آئین میں ملک کے نام سے ہندوستان کا لفظ ہٹا کر صرف لفظ بھارت رکھنے کا بل لایا جائے۔
یہ بھی پڑھیں:
- پہلی بار پارلیمنٹ کے اجلاس کا ایجنڈا اپوزیشن کے ساتھ شیئر نہیں کیا گیا، سونیا گاندھی کا پی ایم مودی کو خط
- Parliament Special Session پارلیمنٹ کا خصوصی اجلاس، اس میں کیا خاص بات ہے؟
تاہم خصوصی اجلاس کا ایجنڈا ابھی تک سامنے نہیں آیا۔پارلیمنٹ کا مانسون اجلاس جو کہ گزشتہ ماہ ختم ہوا وہ پارلیمنٹ کی پرانی عمارت میں منعقد ہوا تھا۔ خصوصی اجلاس کا اعلان سیاسی حلقوں میں حیرانی کے ساتھ سامنے آیا جب پارٹیاں اس سال کے آخر میں پانچ ریاستوں میں اسمبلی انتخابات کی تیاری کر رہی ہیں۔ (یو این آئی مشمولات کے ساتھ)
