شمالی کشمیر ضلع بارہمولہ کے سوپور قصبہ میں ایشیاء کی دوسری سب سے بڑی پھل منڈی ہے۔ یہاں پر غیر ریاستی پھلوں کے کاشتکار پچھلے کئی دہائیوں سے اپنا کاروبار کررہے ہیں۔ یہ لوگ کشمیر کے اندر مختلف فیکٹریوں، انڈسٹریوں کے ساتھ ساتھ سوپور فروٹ منڈی میں سیب کی فروخت کرتے تھے۔ وہیں اچانک کشمیر کے مختلف اضلاع میں نامعلوم بندوق برداروں نے غیر ریاستی مزدوروں پر حملہ کرکے ان کو ہلاک کردیا، جس کی وجہ سے وہ کافی خوف میں ہیں اور اپنے اپنے گھروں کی طرف جانے کے لیے مجبور ہیں۔
انہوں نے اس ناسازگار حالت کی وجہ سے اپنے آبائی علاقوں کا رخ کرنا شروع کردیا ہے، جس کی وجہ سے فروٹ منڈی کے ساتھ وابستہ لوگ کافی پریشان ہیں۔
فروٹ منڈی کے بیرس یونین صدر مدثر احمد بٹ نے میڈیا کو بتایا کہ اس طرح کے واقعات فوراً بند ہونے چاہیے اور سرکار کے ساتھ ساتھ کشمیر کے تمام لوگوں کو ایک ساتھ غیر ریاستی باشندوں کے تحفظ کے لیے آگے آنا چاہیے تاکہ ہمارے کاروبار پر برا اثر نہ پڑے۔
انہوں نے مزید کہا کہ ہم پرزور الفاظ میں ان واقعات کی مذمت کرتے ہیں اور ہم اپنی طرف سے تمام غیر ریاستی پھلوں کے کاشتکار کو اپیل کرتے ہیں کہ وہ کشمیر سے ہجرت نہ کریں۔ ہم ان کو اپنی طرف سے پوری تحفظ فراہم کریں گے۔
