شرد پوار کی قیادت میں غیر بی جے پی رہنماؤں کا اجلاس آج

نیشنلسٹ کانگریس پارٹی (این سی پی) کے سربراہ شرد پوار نے منگل کے روز قومی دارالحکومت دہلی میں مختلف سیاسی پارٹیوں (غیر بی جے پی) کے لیڈروں اور معززین کا ایک اجلاس طلب کیا ہے جس میں ملک کی موجودہ صورتحال پر تبادلہ خیال کیا جائے گا۔

این سی پی رہنما اور مہاراشٹر کے اقلیتی وزیر نواب ملک نے اپنے ٹویٹ میں کہا کہ "آج بروز منگل 22 جون کو صبح ساڑھے گیارہ بجے ہماری پارٹی کے صدر شرد پوار نئی دہلی کے 6، جن پتھ پر اپنی رہائش گاہ پر ایک اہم میٹنگ کریں گے۔'

نواب ملک نے کہا کہ میٹنگ میں آئندہ لوک سبھا اجلاس اور ملک کی موجودہ سیاسی صورتحال پر تبادلہ خیال کیا جائے گا۔

انہوں نے یہ بھی کہا کہ شرد پوار منگل سے ملک کی تمام اپوزیشن پارٹیوں کو متحد کرنے کے لئے کام کریں گے۔

قبل ازیں سیاسی حکمت ساز پرشانت کشور نے پوار سے دہلی میں ان کی رہائش گاہ پر ملاقات کی اور انہیں ملک کی سیاسی صورتحال سے آگاہ کیا۔

یو این آئی