کورونا کی ان پابندیوں پر مکمل طور پر تعمیل کروانے کے مقصد سے راجستھان پولیس بھی کافی مستعد نظر آرہی ہے، پولیس کی مستعدی کا اندازہ اسی بات سے لگایا جاسکتا ہے کہ راجستھان کے چپے چپے پر ناکہ بندی کی گئی ہے، ہر گلی محلوں میں پولیس کے جوان تعینات نظر آرہے ہیں، پولیس محکمے کے افسران کی قیادت میں روزانہ فلیگ مارچ بھی کیا جارہا ہے۔
کورونا ہدایات پر عمل کرنے کی درخواست کے ساتھ ساتھ عوام سے گزارش کی جارہی ہے کہ وہ اپنے گھروں میں ہی رہیں، دوسری جانب پولیس کی جانب سے ایسے لوگوں پر کارروائی کی جارہی ہے جو لوگ بنا وجہ ہی سڑکوں پر گھومتے ہوئے نظر آرہے ہیں، ایسے لوگوں کے خلاف کاروائی کرتے ہوئے ان کا کورونا ٹیسٹ کیا جا رہا ہے اور رپورٹ پازیٹیو آنے کی وجہ سے ان لوگوں کو احتیاط کے پیشِ نظر کورنٹائن بھی کیا جا رہا ہے۔
حکومت کی جانب سے دی گئی ہدایات پر پولیس سختی سے عمل آوری کروارہی ہے۔ ریڈ الرٹ کے مدنظر پولیس کا ایک ویڈیو سوشل میڈیا پر کافی زیادہ تہلکہ مچاتا ہوا نظر آرہا ہے، ویڈیو کے ذریعے پولیس عوام کو یہ پیغام دینا چاہ رہی ہے کہ اگر آپ لوگ بلا کسی وجہ سے سڑکوں پر نکلیں تو آپ لوگوں کے خلاف سخت کارروائی عمل میں لائی جائے گی۔
