کانگریس کے سابق صدر راہل گاندھی نے حکومت اور کسانوں کے مابین دسویں دور کی بات چیت بے نتیجہ رہنے کے بعد سرکار پر حملہ کرتے ہوئے جمعرات کے روز کہا کہ کسانوں کے تعلق سے ہر روز جملہ بازی کرنے کے بجائے فوری طور پر زرعی قوانین کو ختم کر دینا چاہئے۔
راہل گاندھی نے کہا کہ کسان دہلی کی سرحدوں پر تقریبا دو مہینوں سے احتجاج کر رہے ہیں اور اس جدوجہد میں بہت سے کسانوں کی موت بھی ہو چکی ہے، لیکن حکومت ان کے مطالبے قبول کرنے کے بجائے بات چیت کے بہانے جملے گڑھ کر لا رہی ہے۔
راہل گاندھی نے ٹویٹ کیا کہ ’’روز نئے جملے اور ظلم بند کرو، سیدھے سیدھے زراعت مخالف قوانین منسوخ کرو‘‘۔
انہوں نے کسان تحریک سے متعلق ایک تصویر اور ایک خبر بھی پوسٹ کی ہے، جس میں کسان اور حکومت کے مابین بدھ کے روز ہونے والی بات چیت سے متعلق خبر ’آج بھی حکومت اور کسانوں کے مابین نہیں ہوا اتفاق، اب 22 تاریخ کو بات چیت ہوگی‘ دی ہے۔
