کانگریس کے سابق صدر راہل گاندھی نے پیر کے روز پیٹرول اور ڈیزل کی قیمتوں میں جاری اضافے کے لئے وزیر اعظم نریندر مودی پر تنقید کرتے ہوئے کہا ہے کہ ان کے دورِ حکومت میں ٹیکس میں مسلسل اضافے کی لہریں آرہی ہیں، جس سے مہنگائی عروج پر ہے اور عام لوگوں کی زندگی مشکل ہوچکی ہے۔
گاندھی نے ٹویٹ کیا کہ کئی ریاستوں میں ان لاک کا عمل شروع ہو رہا ہے۔ پٹرول پمپ پر بل کی ادائیگی کے دوران آپ کو مودی سرکار کے ذریعہ کی گئی 'مہنگائی میں وکاس' نظر آئے گا۔ ٹیکس وصولی کی وبا کی لہریں مسلسل آتی جارہی ہیں۔
واضح رہے کہ ملک بھر میں پٹرول اور ڈیزل کی قیمتوں میں مسلسل اضافہ ہو رہا ہے۔ دہلی میں پٹرول میں 28 پیسے فی لیٹر اور ڈیزل میں 27 پیسے فی لیٹر کا اضافہ ہوا ہے جب کہ ممبئی میں آج پٹرول 101.57 روپے اور ڈیزل 93.64 روپے فی لیٹر مل رہا ہے۔
وہیں کولکاتہ میں پیٹرول 95.34 روپے اور ڈیزل 89.12 روپے اور چنئی میں پٹرول کی قیمت 96.77 روپے اور ڈیزل 90.97 روپے فی لیٹر ہے۔
