نائب صدر ایم ونکیا نائیڈو نے ہفتہ کے روز خطرے سے دوچار بھارتی زبانوں پر تشویش کا اظہار کیا اور کہا کہ ان کے تحفظ کے لیے ٹھوس اقدامات اور ٹھوس کوششیں کی جانی چاہیے۔
سنگاپور میں سماجی تنظیم شری کلچرل کلا سارتھی کی پہلی سالگرہ کے پروگرام سے ورچوئل خطاب کرتے ہوئے مسٹر نائیڈو نے کہا کہ ہماری ثقافتی روایات کے تحفظ کے لیے اپنی زبانوں کا تحفظ ضروری ہے۔ زبان کسی بھی ثقافت کی زندگی ہوتی ہے۔
انہوں نے کہا 'جہاں زبان ثقافت کو تقویت دیتی ہے، وہیں ثقافت معاشرے کو تقویت دیتی ہے'۔ دنیا میں ہر دو ہفتوں میں ایک زبان کے ناپید ہونے کے بارے میں اقوام متحدہ کی رپورٹ کے حوالہ سے مسٹر نائیڈو نے کہا کہ اس وقت 196 بھارتی زبانیں خطرہ میں ہیں۔
نائب صدر نے اس صورتحال کو تبدیل کرنے کے لیے ٹھوس کاروائی کا مطالبہ کیا اور امید کی کہ تمام بھارتی اپنی اپنی زبانیں محفوظ کرنے کے لیے متحد ہوں۔
- یہ بھی پڑھیے:
تاجروں کو بااختیار بنانے کے لئے حکومت پرعزم : مودی
غیر مقیم بھارتیوں کو ثقافتی سفیر قرار دیتے ہوئے انہوں نے بھارتی اقدار اور رواج کو زندہ رکھنے پر ان کی تعریف کی اور کہا کہ بھارت کو ہمارے قدیم اقدار کو فروغ دینے میں ان کے رول پر ہمیں فخر ہے۔
یو این آئی
