وزیراعظم نریندر مودی نے اشاروں اشاروں میں چین اور پاکستان پر ایک مرتبہ پھر سخت جواب دیتے ہوئے کہا کہ توسیع پسندی ایک طرح کی ذہنی خرابی اور 18 ویں صدی کی سوچ ہے جس کا بھارت سخت جواب دینے کا اہل ہے۔
گزشتہ کئی برسوں کی طرح اس مرتبہ بھی فوجیوں کے درمیان راجستھان کے لونگے والا میں دیوالی منانے پہنچے وزیراعظم نریندر مودی نے ملک کے جانباز فوجیوں کو نیک خواہشات پیش کرتے ہوئے کہا کہ 'آپ بھلے برفیلی پہاڑیوں پر رہیں یا پھر ریگستان میں، میری دیوالی تو آپ کے درمیان آکر ہی پوری ہوتی ہے۔
انہوں نے کہا کہ 'آپ کے چہروں کی رونق اور خوشیاں دیکھتا ہوں تو مجھے دوگنی خوشی ہوتی ہے۔
اس دوران وزیراعظم کے ساتھ بارڈر سکیورٹی فورس (بی ایس ایف) کے ڈائریکٹر جنرل راکیش استھانا، چیف آف ڈیفنس اسٹاف بیپن راوت اور فوجی سربراہ ایم ایم نروانے بھی موجود تھے۔
نریندر مودی نے کہا کہ 'آج بھارت کی حکمت عملی واضح اور صاف ہے۔ آج کا بھارت سمجھنے اور سمجھانے کی پالیسی پر یقین رکھتا ہے لیکن اگر ہمیں آزمانے کی کوشش ہوتی ہے تو جواب بھی اتنا ہی سخت ملتا ہے۔
انہوں نے فوجی جوانوں سے خطاب کرتے ہوئے کہا کہ 'سرحد پر رہ کر آپ جو قربانی پیش کرتے ہیں وہ ملک میں اعتماد پیدا کرتا ہے۔ یہ یقین ہوتا ہے کہ مل کر لڑنے سے بڑے سے بڑے چیلنج کا سامنا کیا جاسکتا ہے۔
وزیراعظم نریندر مودی نے پاکستان پر بھی حملے کرتے ہوئے اعلان کیا کہ بھارت سمجھنے اور سمجھانے پر یقین رکھتا ہے لیکن اگر اسے آزمانے کی کوشش کی گئی تو جواب بھی اتنا ہی شدید ملے گا۔
