چنئی: وزیر اعظم نریندر مودی آج تمل ناڈو کے اپنے دورے کے دوران 2,437 کروڑ روپے کی لاگت سے تعمیر کردہ چنئی ہوائی اڈے پر جدید ترین مربوط ٹرمینل عمارت سمیت کئی بنیادی ڈھانچے کے منصوبوں کا افتتاح کریں گے۔ پولیس نے کہا کہ وزیر اعظم کے دورہ کے پیش نظر شہر بھر میں سیکورٹی بڑھا دی گئی ہے، جبکہ گاڑی چلانے والوں سے کہا گیا ہے کہ وہ اپنی منزلوں تک پہنچنے کے لیے پہلے سے اپنے سفر کی منصوبہ بندی کریں کیونکہ ٹریفک کے راستے تبدیل کیے گئے ہیں۔ اپنی آمد کے بعد مودی نئے ٹرمینل کا افتتاح کریں گے جس کا پہلا مرحلہ مکمل ہو چکا ہے۔ اس کے ساتھ مسافروں کی تعداد سالانہ 35 ملین تک بڑھنے کی امید ہے۔
وزیر اعظم مودی نے ایک ٹویٹ میں کہا تھا کہ 'یہ چنئی کے بنیادی ڈھانچے کے لیے ایک اہم سنگ میل ثابت ہوگا۔ اس سے مقامی معیشت کو فائدہ ہوگا۔ چنئی ہوائی اڈے کے حکام کے مطابق، نیا ٹرمینل 2.20 لاکھ مربع میٹر پر پھیلا ہوا ہے اور یہ تمل ناڈو میں بڑھتے ہوئے ہوائی ٹریفک کو پورا کرے گا۔ شہری ہوا بازی سے متعلق وزارت نے کہا ہے کہ 'سالانہ 35 ملین مسافروں کی گنجائش کے ساتھ، چنئی ہوائی اڈے پر جدید ترین سہولت سب کے لیے ہوائی سفر کے تجربات کو بہتر بنائے گی۔
نئے ٹرمینل کا افتتاح کرنے کے علاوہ وزیر اعظم مودی یہاں ڈاکٹر ایم جی آر سنٹرل ریلوے اسٹیشن سے چنئی اور کوئمبٹور کے درمیان وندے بھارت ٹرین کو بھی ہری جھنڈی دکھائیں گے۔ سدرن ریلوے نے دونوں شہروں کے درمیان بدھ کے علاوہ تمام دنوں میں وندے بھارت ایکسپریس ٹرینیں چلانے کا منصوبہ بنایا ہے۔ سدرن ریلوے نے کہا کہ ٹرین دونوں سمتوں میں 130 کلومیٹر فی گھنٹہ کی رفتار سے تقریباً 5.50 گھنٹے میں منزل تک پہنچے گی، اس طرح ایکسپریس ٹرین کے مقابلے میں 1.20 گھنٹے کا سفری وقت بچ جائے گا۔
بعد ازاں مودی کمارجر سلائی (بیچ روڈ) پر واقع وویکانند اِلام میں رام کرشنا مٹھ کی 125ویں سالانہ تقریبات میں شرکت کریں گے اور پلاورم میں بنیادی ڈھانچے کے منصوبوں کا افتتاح بھی کریں گے۔
