شملہ: وزیر اعظم نریندر مودی نے آج ہماچل پردیش کے اونا ریلوے اسٹیشن سے وندے بھارت ایکسپریس کو ہری جھنڈی دکھائی۔ یہ ملک میں شروع ہونے والی چوتھی وندے بھارت ایکسپریس ٹرین ہے۔ بلک ڈرگ پارک اور آئی آئی آئی ٹی کیمپس کا بھی افتتاح کیا۔PM Modi in Himachal Pradesh
مودی اونا کے بعد چمبا پہنچے، یہاں چوگن میں ایک ریلی سے خطاب کریں گے۔ چمبا میں وزیر اعظم گرامین سڑک یوجنا کے تیسرے مرحلے کا آغاز کریں گے۔ اس کے علاوہ بجلی کے دو منصوبوں کا سنگ بنیاد رکھا جائے گا۔ قبل ازیں جلسہ عام سے خطاب کرتے ہوئے مودی نے کہا کہ آج کا نیا ہندوستان تمام پرانے چیلنجوں پر تیزی سے کام کر رہا ہے، جو سہولتیں پچھلی صدی میں عوام تک پہنچنی چاہیے تھیں وہ اب لوگوں تک پہنچ رہی ہیں۔
انہوں نے کہاکہ 'ہم نہ صرف 20ویں صدی کے لوگوں کی ضروریات کو پورا کر رہے ہیں بلکہ ہماچل میں گھر گھر جا کر 21ویں صدی کی جدید سہولیات بھی دیئے جا رہے ہیں۔ اسی لیے آج ہماچل کی ترقی کے لیے بے مثال کام کیا جا رہا ہے۔ آج جہاں ہماچل میں دیہی سڑکیں دوگنی رفتار سے بن رہی ہیں، وہیں گرام پنچایتوں کو بھی تیز رفتاری سے رابطہ فراہم کیا جا رہا ہے۔ '
گزشتہ حکومتوں پر طنز کرتے ہوئے مودی نے کہا کہ 40 سال پہلے دہلی میں بیٹھی حکومت نے ایک چھوٹی ریلوے لائن پر مہر لگائی، فائل بنائی اور دستخط کئے۔ الیکشن آیا تو لوگوں کے آنکھوں میں دھول جھونک کر ووٹ اکٹھے کیے لیکن زمین پر ایک بھی کام نہیں ہوا۔ ایک طرف جہاں ہماچل میں ہزاروں بیت الخلاء بن رہے ہیں وہیں دوسری طرف ہر گاؤں میں بجلی کا نظام بہتر کیا جا رہا ہے۔ اونا سے چوتھی وندے بھارت ٹرین کے روانہ ہونے کے بعد چمبا پہنچنے پر مودی نے ڈبل انجن والی حکومت کے فوائد کا ذکر کیا اور اسٹیج پر پہنچ کر میدان میں جمع ہونے والے بہت بڑے ہجوم کا جھک کر استقبال کیا۔
مودی آج نو دنوں میں دوسری بار ہماچل پردیش کا دورہ کر رہے ہیں۔ انہوں نے کہا کہ ملک کو میڈ ان انڈیا وندے بھارت ٹرین سے جوڑا جا رہا ہے۔ چن پورنی، نینا دیوی، جوالاجی دیوی، برجیشوری دیوی اور آنند پور صاحب کے درمیان سفر اب وندے بھارت ایکسپریس ٹرین کے ذریعے آسان ہو جائے گا۔ حکومت نے کرتارپور کوریڈور کے ذریعے جو کام کیا ہے، وہ اب اسے مزید طاقتور بنائے گا۔ ہماچل میں بہت سے لوگ ایسے ہیں جنہوں نے نہ تو ٹرین دیکھی ہے اور نہ ہی اس میں سوار ہوئے ہیں۔ آج آپ کو صرف ٹرین ہی نہیں ہندوستان کی جدید ترین ٹرین مل گئی ہے۔
یو این آئی
