وزیر اعظم نریندر مودی نے جمعہ کو کہا کہ 'میں دیوالی کے موقع پر کل سرحد پر اپنے فوجیوں کے ساتھ تھا اور آج میں ان فوجیوں کی سرزمین پر ہوں۔'
آج کیدارناتھ دھام میں پوجا کرنے کے بعد آدی گروشنکر اچاریہ کی سمادھی اور مجسمے کی نقاب کشائی کرنے کے ساتھ بنیادی ڈھانچے کے منصوبوں کا افتتاح کرنے کے بعد مودی نے ایک پروگرام سے خطاب کرتے ہوئے کہا کہ، ’میں نے تہواروں کی خوشیاں ملک کے بہادر فوجیوں کے ساتھ بانٹی ہیں۔ 130 کروڑ شہریوں کا پیار اور’ آشیرواد‘ لے کر فوج کے جوانوں کے بیچ گیا تھا اور آج انہیں کی سرزمین پر آیا ہوں‘۔
انہوں نے کہا کہ ’یہ ہندوستان کی روحانی خوشحالی اور وسعت کا ایک بہت ہی مافوق الفطرت منظر ہے۔ کچھ تجربات اتنے مافوق الفطرت اور لامحدود ہوتے ہیں کہ انھیں لفظوں میں بیان نہیں کیا جا سکتا۔ کیدارناتھ کی پناہ میں آکر میرا احساس اسی طرح کا ہوتا ہے‘۔
انہوں نے کہا، ’آج آپ سب آدی شنکر اچاریہ کی سمادھی کے دوبارہ قیام کے گواہ بن رہے ہیں۔ آج شنکر اچاریہ روایت سے وابستہ تمام عظیم رشی منی اور ملک کے ہر کونے سے عقیدت مند کیدارناتھ کی اس پاکیزہ سر زمین کے ساتھ ہمیں آشیرواد دے رہے ہیں‘۔
مزید پڑھیں: PM Modi: وزیر اعظم نریندر مودی نے شنکراچاریہ کے مجسمے کی نقاب کشائی کی
وزیر اعظم نے کہا ،’برسوں پہلے یہاں ہونے والا جو نقصان تھا‘ وہ ناقابل تصور تھا۔ جو لوگ یہاں آتے تھے، وہ سوچتے تھے کہ کیا یہ ہمارا کیدار دھام دوبارہ اٹھ کھڑا ہو گا؟ لیکن میری اندرونی آواز کہہ رہی تھی کہ یہ پہلے سے زیادہ آن بان شان کے ساتھ کھڑا ہوگا‘۔
واضح رہے کہ وزیر اعظم نریندر مودی جمعہ کی صبح کیدارناتھ دھام پہنچے ہیں۔
یو این آئی
