Child Marriage in Assam آسام میں گزشتہ ہفتے کم عمری میں شادی کے 4000 سے زیادہ واقعات درج

کم عمری میں شادی کو روکنے کے لیے آسام حکومت تیار ہے اور اس کے خلاف مسلسل کارروائی کی جا رہی ہے۔ بتایا جا رہا ہے کہ آسام میں کم عمری میں شادی کے خلاف 4000 سے زیادہ کیس درج کیے گئے ہیں۔

گوہاٹی: آسام میں گزشتہ ہفتے کم عمری میں شادی کے خلاف 4000 سے زیادہ کیس درج کیے گئے ہیں۔ سرکاری ذرائع نے جمعرات کو یہ اطلاع دی۔آسام کے وزیر اعلی ہیمنت بسوا سرما نے ٹویٹ کیا، 'آسام حکومت ریاست میں کم عمری کی شادی کو ختم کرنے کے لیے پرعزم ہے۔ اب تک آسام پولیس نے پوری ریاست میں 4004 مقدمات درج کیے ہیں اور آنے والے دنوں میں پولیس کی کارروائی کا امکان ہے۔ مقدمات کی کارروائی 3 فروری سے شروع ہوگی۔ میں سب سے تعاون کی درخواست کرتا ہوں۔'

خیال رہے کہ سرما نے حال ہی میں کچھ کمیونٹیز میں بچوں کی شادی کے بارے میں بات کی تھی۔ انہوں نے ریاست میں کم عمری کی شادی کی برائی کو ختم کرنے کے حکومت کے عزم کا بھی اعادہ کیا۔سرما کے اشتراک کردہ اعداد و شمار میں دھوبری ضلع میں سب سے زیادہ 370 بچوں کی شادی کے واقعات رپورٹ ہوئے، اس کے بعد ہوجئی 255 اور ادلگوری میں 235 ہیں۔ دیما ہاساو میں بچوں کی شادیوں کے سب سے کم معاملے ہیں۔1929 کے ایکٹ کے مطابق 14 سال سے کم عمر لڑکیوں اور 18 سال سے کم عمر کے لڑکوں کی شادی ممنوع ہے۔ 1978 کے ایکٹ میں ترمیم کرکے خواتین کے لیے شادی کی کم از کم عمر 18 سال اور مردوں کے لیے 21 سال کر دی گئی۔

یواین آئی