اترپردیش کے علی گڑھ شہر سے بی جے پی کے ممبر پارلیمنٹ ستیش کمار گوتم نے اپنی حکومت کا دفاع کرتے ہوئے کہا کہ ''کورونا وائرس ایک ایسی وبائی بیماری ہے جسے صرف بھگوان ہی روک سکتے ہیں، حکومتیں ان حالات میں کچھ نہیں کر سکتیں۔ اس سلسلہ میں حکومت پر الزام تراشی مناسب نہیں ہے۔''
انہوں نے دعویٰ کیا ہے کہ ریاست میں زندگی بچانے والی گیس کی کوئی کمی نہیں ہے۔ آکسیجن کی کمی کی وجہ سے کوئی نہیں مررہا ہے۔
لیکن دوسری جانب بی جے پی کے ممبر پارلیمنٹ کے دعوؤں کے برخلاف، یوپی کے علی گڑھ ضلع میں درجنوں کووڈ اموات ہوئیں۔ کووڈ مریضوں کے رشتے دار اور نگہداشت کرنے والے ضلع کے مختلف آکسیجن پلانٹوں پر جمع ہوتے دکھائی دیتے ہیں۔ جنہیں آکسیجن وقت پر مہیا نہیں ہوسکی یا پھر آکسیجن انہیں بلیک میں خریدنا پڑا، ایسے افراد کی تعداد زیادہ ہے جنہیں آکسیجن خریدنے کے لیے بڑی رقم دستیاب نہیں تھی، یہی وجہ ہے کہ مہنگی بلیک والی آکسیجن خرید نہ پانے کی وجہ سے انہوں نے اپنوں کو کھودیا ہے۔
دیکھا جارہا ہے کہ ضلع میں آکسیجن کی ناکافی فراہمی کی وجہ سے بہت سے کووڈ مریض اپنی جانیں گنوا رہے ہیں۔ تاہم علی گڑھ سے تعلق رکھنے والے بی جے پی کے ممبر پارلیمنٹ ستیش کمار گوتم کا دعویٰ ہے کہ آکسیجن کی کمی کی وجہ سے کوئی نہیں مررہا ہے اور نہ ہی زندگی بچانے والی گیس کی کوئی کمی ہے۔ لیکن ان کے اس دعوے کو متعدد مقامی افراد نے سرے سے خارج کردیا ہے۔
خفیہ خبروں کے مطابق زیادہ تر معاملات میں آکسیجن پلانٹس میں موجود دلال کووڈ مریضوں کے لواحقین سے آکسیجن سلنڈروں کے لئے بھاری رقم وصول کرتے ہوئے بھی دیکھے جارہے ہیں۔ آکسیجن سلنڈر کی قیمت برداشت کرنے سے قاصر، بہت سے لوگوں نے اپنی جان بھی گنوا دی۔
بی جے پی کے رکن پارلیمنٹ سے اس بارے میں پوچھ گچھ کرنے پر انہوں نے کہا کہ میڈیکل آکسیجن کے محتاج افراد ٹول فری نمبر '9457762404' کا استعمال کرکے ان سے رابطہ کرسکتے ہیں، اگر ایسے افراد جنہیں ضرورت ہے تو ایسے ضرورت مندوں کو آکسیجن ضرور فراہم کی جائے گی۔
