پٹنہ: نتیش کمار نے خانقاہ مجیبیہ میں ریاست کے امن و سکون کے لیے دعا کی

جموں و کشمیر کے حالات پر بات کرتے ہوئے وزیر اعلیٰ نے کہا کہ ہم نے وہاں کے لیفٹیننٹ گورنر سے بات کی ہے. لفٹیننٹ گورنر نے یقین دہانی کرائی ہے کہ بہار کے لوگوں کے تحفظ کے سلسلے میں جو کچھ بھی ممکن ہوگا وہ کیا جائے گا۔

بہار کے وزیر اعلیٰ نتیش کمار دیر شب پھلواری شریف میں واقع خانقاہ مجیبیہ میں عرس کے موقع پر مخدوم سید شاہ پیر محمد مجیب اللہ قادری رحمۃ اللہ علیہ کے مزار پر چادر پوشی کے لئے پہنچے اور ریاست میں امن و امان اور ترقی کی دعا کی۔ دعا خانقاہ مجیبیہ کے ناظم حضرت مولانا منہاج الدین قادری نے کرائی۔ چادر پوشی سے قبل وزیر اعلیٰ نتیش کمار نے خانقاہ مجیبیہ کے سجادہ نشیں حضرت مولانا شاہ محمد آیت اللہ قادری سے ملاقات کرکے ان سے دعائیں لی۔

اس موقع پر وزیر اعلیٰ نے میڈیا سے بات کرتے ہوئے کہا کہ عرس کے مبارک موقع پر کئی سالوں سے مجھے یہاں آنے کا موقع مل رہا ہے، یہاں آکر مجھے خوشی و اطمینان حاصل ہوتا ہے. ہماری دعا ہے کہ سماج میں محبت اور بھائی چارہ کا ماحول قائم رہے، تمام لوگ متحد ہوکر ریاست و ملک کی ترقی میں اپنا تعاون پیش کریں، انہوں نے کہا کہ لوگوں کے درمیان آپس میں محبت اور ہم آہنگی ہو اور تمام لوگ متحد ہوکر رہیں تاکہ فرقہ پرست ذہن رکھنے والے اپنے منصوبے میں ناکام ہوں۔

جموں و کشمیر کے حالات پر بات کرتے ہوئے وزیر اعلیٰ نے کہا کہ ہم نے وہاں کے لیفٹیننٹ گورنر سے بات کی ہے. لیفٹیننٹ گورنر نے یقین دہانی کرائی ہے کہ بہار کے لوگوں کے تحفظ کے سلسلے میں جو کچھ بھی ممکن ہوگا وہ کیا جائے گا۔

اس موقع پر وزیر تعلیم وجے کمار چودھری، رکن پارلیمان رام کرپال یادو، بہار سنی وقف بورڈ کے چیئرمین ارشاد اللہ، ڈی ایم چندر شیکھر سنگھ، ایس پی اوپندر شرما سمیت کئی اہم شخصیات موجود تھیں۔