ریاست کرناٹک کے گلبرگہ سٹی کارپوریشن 2021 کے انتخابات میں کانگریس پارٹی کے 27 امیدوار کامیاب ہوئے۔ اس موقع پر گلبرگہ کانگریس پارٹی کی جانب سے ضلع پارٹی دفتر میں کانگریس کے امیدواروں کا تہنیتی اجلاس منعقد کیا گیا۔
اس دوران رکن اسمبلی محترمہ کنیز فاطمہ نے کہا کہ یہاں پر کل 55 وارڈز ہیں۔ ان میں کانگریس پارٹی کے 27 امیدوار کامیاب ہوئے ہیں۔ گلبرگہ میں سب سے زیادہ کانگریس پارٹی کو ہی کامیابی ملی۔
انہوں نے کہا کہ گلبرگہ سٹی کارپوریشن میں ہمیشہ کانگریس پارٹی کی حکومت رہی ہے۔ اس بار بھی کانگریس پارٹی کی جانب سے ہی میئر بنایا جائے گا۔ سٹی کارپوریشن انتخابات میں پارٹی رہنماوں اور ورکرس کی محنت سے ہی بڑی کامیابی ملی ہے۔
مزید پڑھیں:۔کرناٹک: کانگریس چھوڑ کر بی جے پی میں شمولیت کے لیے پیسے کی پیشکش کی تھی: شریمنت بالا صاحب پاٹل
انہوں نے مزید کہا کہ اسی طرح آنے والے اسمبلی انتخابات میں پارٹی کو کامیاب بنانے کے لئے کانگریس کے تمام رہنماؤں اور ورکرز کو کام کرنے کی ضرورت ہے۔ آئندہ ریاست میں کانگریس پارٹی کی حکومت بنے گی۔
