بھارت میں تیزی سے بڑھتے کورونا کے کیسیز کے دوران وزیر خزانہ نرملا سیتارمن نے منگل کو یہ واضح کیا کہ حکومت بڑے پیمانے پر لاک ڈاؤن نہیں لگائے گی، بلکہ کنٹینمینٹ ژون کے ذریعہ اس پر قابو پانے کی کوشش کی جائے گی۔
ورلڈ بینک گروپ کے صدر ڈیوڈ مالپاس کے ساتھ ایک ورچوئل میٹنگ کی۔ اس میٹنگ میں وزیر خزانہ نے عالمی بینک کا یہ کہتے ہوئے شکریہ بھی ادا کیا کہ' عالمی بینک نے بھارت کی ترقی کے لیے مزید قرضے کی گنجائش میں اضافہ کیا ہے یہ قابل تعریف ہے۔
اس دوران نرملا سیتا رمن نے یہ بھی واضح کیا کہ 'حکومت ملکی سطح پر لاک ڈاؤں نہیں نافذ کرے گی۔ وزیر خزانہ نے اپنے ایک ٹویٹ میں کہا کہ 'اس وبائی مرض کی دوسری لہر کے پھیلاؤ پر قابو پانے کے لیے اٹھائے جانے والے اقدامات کو مشترکہ طور پر شامل کیا جائے، جس میں ٹیسٹ، ٹریک ٹریٹ ویکسینیشن کی پانچ بنیادی حکمت عملی اور کورونا کے مناسب طرز عمل شامل ہے'۔
انہوں نے کہا کہ 'کورونا کی دوسری لہر کے باوجود بڑے پیمانے پر لاک ڈاؤن کرنا ممکن نہیں ہے کیونکہ اس سے معیشت پر کافی گہرا اثر پڑ سکتا ہے۔'
