بین ریاستی موٹر سائیکل چور گروہ کے گھر چھاپہ ماری کرنے پہنچے بہار پولیس کے کشن گنج ٹاؤن تھانہ کے ایس ایچ او اسونی کمار کو غیر سماجی عناصر نے پیٹ پیٹ کر موت کے گھاٹ اتار دیا۔ واقع بنگال کے اتردینا جپور ضلع کے گوالپوکھر تھانہ کے پانتا پاڑہ گاؤں کا ہے۔ واقعہ کی خبر ملنے کے بعد بنگال پولیس نے ایس ایچ او کی لاش کو پوسٹ مارٹم کیلئے اسلام پور صدر اسپتال بھیج دیا۔
اطلاع کے مطابق کشن گنج پولیس کو موٹر سائیکل چوری کی اطلاع ملی تھی کہ پنتا پاڑہ گاؤں میں موٹر سائیکل چور گروہ کے سرغنہ کا اہم ملزم موجود ہے۔ اس کے بعد صدر تھانہ کے ایس ایچ او اپنے پولیس اہلکاروں کی ٹیم کے ساتھ پنتا پاڑہ گاؤں پہنچی۔ وہیں اس سرغنہ کے اہم ملزم محمد فیروز عالم و دیگر افراد نے گھیر کر اینٹ پتھر سے پولیس ٹیم پر حملہ کرنا شروع کر دیا جس سے ایس ایچ او کی موقع پر ہی موت ہوگئی-
وہیں اس واقع کے خبر ملتے ہی کشن گنج ایس پی کمار آشش اور پورنیہ آئی جی ایس کے چودھری اسلام پور اسپتال پہنچ گئے جہاں کشن گنج ایس ایچ او اسونی کمار لاش کا پوسٹ مارٹم کیا گیا۔ پوسٹ مارٹم کے بعد ایس ایچ او کی لاش کو کشن گنج لایا گیا اور سرکاری اعزاز کے ساتھ آخری رسومات ادا کیا گیا،
پورنیہ آئی جی ایس کے چودھری نے میڈیا کے سامنے کشن گنج ایس ایچ او اسونی کمار کی ہجوم کے ذریعہ پیٹ پیٹ کر موت ہونے کی تصدیق کی۔ انہوں نے میڈیا کو بتایا کہ کشن گنج ایس ایچ او پولیس کی دو ٹیم کے ساتھ بنگال کے پنتا پاڑہ گاؤں میں موٹر سائیکل چور گروہ کو گرفتار کرنے پہنچ تھی اسی دوران غیر سماجی عناصر نے پولیس کی ٹیم پر حملہ کردیا جس میں ایس ایچ او کی موت ہوگئی۔
جبکہ اس پورے معاملہ میں موٹر سائیکل چور گروہ کے اہم سرغنہ فیروز عالم(35) سمیت تین افراد کو پولیس نے گرفتار کرلیا ہے جس میں ایک فیروز عالم کا بھائی ابوزر عالم (25) اور ماں شاہ نور بیگم (55) شامل ہے، فی الحال یہ تینوں ملزمین کو بنگال پولیس کی حراست میں رکھا گیا ہے۔
وہیں اس واقع سے پورے علاقہ کے ساتھ ساتھ اتر دیناجپور ضلع اور کشن گنج ضلع پولیس محکمہ میں ہلچل اور غم کا ماحول پیدا ہوگیا ہے۔
