مرکزی حکومت نے کرتارپور صاحب کوریڈور کو 17 نومبر سے دوبارہ کھولنے کا فیصلہ کیا ہے۔ مرکزی وزیر داخلہ امت شاہ نے اس کی جانکاری ٹویٹ کے ذریعے دی ہے۔
انہوں نے ٹویٹ میں کہا کہ وزیر اعظم نریندر مودی حکومت نے کل 17 نومبر سے کرتارپور صاحب کوریڈور کو دوبارہ کھولنے کا فیصلہ کیا ہے۔ اس فیصلے سے بڑی تعداد میں سکھ تیرتھ یاتری مستفید ہوں گے۔ یہ فیصلہ مودی حکومت کی شری گرو نانک دیو جی اور ہماری سکھ برادری کے تئیں بے پناہ عقیدت کو ظاہر کرتا ہے۔
انہوں نے یہ بھی ٹویٹ کیا کہ ملک 19 نومبر کو شری گرو نانک دیو جی کے پرکاش اتسو کو منانے کے لیے پوری طرح تیار ہے۔ مجھے یقین ہے کہ کرتارپور صاحب کوریڈور کو دوبارہ کھولنے کا وزیر اعظم نریندر مودی کا فیصلہ پورے ملک کی خوشیوں کو دوبالا کردے گا۔
