جودھ پور: ریاست راجستھان میں جودھ پور تشدد کے بعد ضلع بھر میں پولیس کی بھاری نفری تعینات ہے۔ کشیدگی کے بعد اب تک 97 افراد کو گرفتار کیا جا چکا ہے۔ پولیس افسر نے منگل کو یہ جانکاری دی۔ ضلع میں کرفیو پر سختی سے عمل کیا جا رہا ہے۔ Jodhpur Violence, Accused were Arrested
اعلیٰ سطح کے افسران کو یہاں تعینات کیا گیا ہے۔ ضلع میں ہونے والے تمام چھوٹے بڑے واقعات پر نظر رکھی جا رہی ہے۔ آپ کو بتا دیں کہ عید سے ایک دن قبل جودھ پور شہر میں کشیدگی کے بعد منگل کو 10 تھانوں کے علاقوں میں کرفیو نافذ کر دیا گیا تھا۔ لوگوں سے امن اور ہم آہنگی برقرار رکھنے کی اپیل کرتے ہوئے وزیراعلیٰ اشوک گہلوت نے عہدیداروں کو ہدایت دی ہے کہ ایسے واقعات کے ذمہ دار سماج دشمن عناصر کے خلاف سخت کارروائی کی جائے۔ Violence In Jodhpur on Eid
دریں اثنا بھارتیہ جنتا پارٹی راجستھان کے ریاستی صدر ستیش پونیا نے گورنر کلراج مشرا سے جودھ پور میں تشدد کے واقعات کی تحقیقات شروع کرنے اور ریاست میں امن و امان برقرار رکھنے کے لیے ریاستی حکومت کو ضروری ہدایات دینے کی درخواست کی ہے۔ ستیش پونیا نے ایک خط کے ذریعے گورنر سے درخواست کرتے ہوئے لکھا ہے۔ آپ (گورنر) سے درخواست کی جاتی ہے کہ واقعات کی منصفانہ تحقیقات کریں اور معاملے کا نوٹس لیں، براہ کرم ریاستی حکومت کو ضروری ہدایات دیں، تاکہ امن قائم ہو۔ انہوں نے گورنر سے ملزمان کے خلاف سخت کارروائی کرنے کی بھی اپیل کی۔
واضح رہے کہ وزیر اعلیٰ اشوک گہلوت کے آبائی ضلع جودھ پور کے جلوری گیٹ سرکل میں نماز عید کے بعد بھی جھڑپ ہوئی تھی۔ پولیس کو بھیڑ کو منتشر کرنے کے لیے لاٹھی چارج کرنا پڑا۔ اس کے بعد پیر کو جلوری گیٹ چوراہے پر بالمکند بسا میں مختلف جھنڈے لہرانے پر دو گروپوں کے درمیان پتھراؤ کے واقعات کے بعد ضلع میں کشیدگی کا ماحول ہے۔ غور طلب ہے کہ اعلیٰ حکام شہر کی صورتحال پر نظر رکھے ہوئے ہیں۔ سکیورٹی کے پیش نظر 1000 پولیس اہلکار تعینات کیے گئے ہیں۔ شہر میں موبائل انٹرنیٹ سروس فی الحال معطل ہے۔ واقعے میں زخمی ہونے والے افراد اسپتال میں زیر علاج ہیں، جن میں سے بعض کو ابتدائی طبی امداد کے بعد فارغ کردیا گیا ہے۔
