بھارت کے وزیر خارجہ ایس جے شنکر اتوار کو اسرائیل کے پانچ روزہ سرکاری دورے پر جا رہے ہیں، جہاں وہ اسرائیل کے وزیر اعظم نفتالی بینیٹ اور وزیر خارجہ جیر لاپیڈ سے پہلی مرتبہ ملاقات کریں گے۔
اسرائیل میں نئی حکومت کے قیام کے بعد ہندوستان اور اسرائیل کے درمیان یہ پہلا اعلیٰ سطحی رابطہ ہوگا۔ ڈاکٹر جے شنکر، اسرائیل کے وزیر اعظم اور وزیر خارجہ مسٹر لیپڈ کی دعوت پر تشریف لا رہے ہیں اور تل ابیب میں ان کے ساتھ دو طرفہ ملاقات کریں گے۔ وزیر خارجہ جے شنکر، اسرائیل کے صدر اسحاق ہرزوگ ، وزیر اعظم مسٹر بینیٹ ، اسرائیلی پارلیمنٹ کنسیٹ کے اسپیکر اور ملک کے قومی سلامتی کے مشیر ایال ہولاتا سے بھی ملاقات کریں گے۔
اس کے علاوہ وزیر خارجہ، اسرائیل میں رہنے والے ہندوستانی نژاد یہودی برادری کے لوگوں، ہندوستانی علوم کا مطالعہ کرنے والے ماہرین، اسرائیلی یونیورسٹیوں میں تعلیم حاصل کرنے والے ہندوستانی طلباء اور ہندوستان سے کاروبار کرنے والے تاجروں سے بھی ملاقات کریں گے۔ ساتھ میں وہ ہندوستانی فوجیوں کو خراج عقیدت پیش کریں گے جنہوں نے پہلی جنگ عظیم میں قربانیاں دیں تھیں۔
اسرائیل کے سیکریٹری خارجہ ایلون اشپیز نے ٹوئٹ کرکے دسہرہ کی مبارکباد دیتے ہوئے ڈاکٹر جے شنکر کا خیرمقدم کیا اور کہا کہ ہندوستان ایک اسٹریٹجک اور قریبی شراکت دار ہے اور ڈاکٹر جے شنکر ایک اہم دورے پر آرہے ہیں۔
یواین آئی
