نئی دہلی: آسٹریلیا میں 16 اکتوبر سے شروع ہونے والے T20 ورلڈ کپ سے قبل بھارتی ٹیم کو بڑا دھچکا لگا ہے۔ ٹیم انڈیا کے اہم گیند باز جسپریت بمراہ چوٹ کی وجہ سے T20 ورلڈ کپ سے باہر ہو گئے ہیں۔ خبر رساں ایجنسی پی ٹی آئی نے بی سی سی آئی ذرائع کے حوالے سے یہ اطلاع دی ہے، حالانکہ بی سی سی آئی کی جانب سے اس سلسلے میں کوئی بیان سامنے نہیں آیا ہے، بی سی سی آئی کی تصدیق ابھی باقی ہے۔
بتادیں کہ جسپریت بمراہ آسٹریلیا سیریز میں ہی واپسی کی، اس سے قبل وہ انجری کے باعث باہر تھے، لیکن واپسی کے بعد وہ صرف دو میچ ہی کھیل سکے۔ جنوبی افریقہ کے خلاف بھی پہلے میچ میں وہ پلیئنگ 11 میں نظر نہیں آئے۔ جسپریت بمراہ انجری کی وجہ سے ایشیا کپ-2022 سے بھی باہر تھے۔
خبر رساں ایجنسی پی ٹی آئی کے مطابق جسپریت بمراہ کی انجری سنگین ہے اور وہ مہینوں کرکٹ کے میدان سے دور رہ سکتے ہیں۔ بی سی سی آئی ذرائع کے حوالے سے پی ٹی آئی نے جسپریت بمراہ کے ٹی 20 ورلڈ کپ سے باہر ہونے کی تصدیق کر دی ہے۔
جسپریت بمراہ کمر کی تکلیف کی وجہ سے جنوبی افریقہ کے خلاف پہلا ٹی ٹوئنٹی میچ بھی نہیں کھیل سکے تھے، لیکن اب بتایا جا رہا ہے کہ یہ مسئلہ زیادہ سنگین ہے اور فریکچر بھی ہو سکتا ہے، جس کی وجہ سے جسپریت بمراہ کو کرکٹ سے دور رہنا پڑ سکتا ہے۔
جب سے ٹی 20 ورلڈ کپ کے لیے ٹیم کا اعلان ہوا ہے، ٹیم انڈیا کا تناؤ بڑھتا ہی جا رہا ہے۔ پہلے رویندرا جڈیجہ انجری کے باعث ورلڈ کپ سے باہر ہوئے تھے اور انہیں ٹیم میں شامل نہیں کیا گیا۔ اس کے بعد ٹیم میں شامل دیپک ہڈا بھی حال ہی میں زخمی ہو گئے جس کی وجہ سے انہیں جنوبی افریقہ کے خلاف ٹی ٹوئنٹی سیریز سے باہر ہونا پڑا تھا۔ اور اب جسپریت بمراہ چوٹ کی وجہ سے T20 ورلڈ کپ سے باہر ہیں۔
جسپریت بمراہ کا T20 ورلڈ کپ سے باہر ہونا بھارت کے لیے بڑا دھچکا ہے۔ ایسے میں اب سوال یہ پیدا ہوتا ہے کہ ان کی جگہ کسے ٹیم میں شامل کیا جائے۔ فی الحال دیپک چاہر اور محمد سمیع اسٹینڈ بائی کھلاڑیوں کا حصہ ہیں، اس لیے ان میں سے کسی ایک کو اسکواڈ میں شامل کیا جا سکتا ہے۔ آئی سی سی کے قوانین کے مطابق 15 اکتوبر تک ٹیم انڈیا ٹی 20 ورلڈ کپ کے اہم اسکواڈ میں تبدیلیاں کر سکتی ہے۔
مزید پڑھیں:
